Shillong, Rymphang 17: Ka sorkar jylla mynta ka sngi kala pynpaw paidbah iaka jingshimkhia ka jongka ban pyrkhing iaka jingwan rung beain jong ki mynder ri, da kaba iathuh ba haduh 658 ngut ki nong Bangladesh la shah tian bishar bad 194 ngut la pynphai noh sha katei ka ri naduh u snem 2021.
Ia kane la pyntip da u Symbud Myntri Rangbah ka jylla, u Bah Prestone Tynsong haba jubab iaka call attention kaba la wanrah da u Bah Heaving Stone Kharpran, MLA jongka VPP na Mawryngkneng hapoh ka Ingdorbar Thawain ka jylla. U la iathuh ba ka jylla ka shanniah ha ki ba bun syrtap ki lad jingiada naka jingioh rung kyrthep ki mynder kiba iadei naduh ki khappud, ha ki district bad ruh lyngba ki tnad treikam sorkar.
Kumba long mynta, ki don kumba 18 tylli ki check post, gates bad land custom station kiba treikam ha ki khappud ka jylla bad ka ri Bangladesh.
U Bah Prestoen Tynsong u la iathuh ruh ba ki District Level Squads ki ju pynlong iaki jingtalasi kynsan ha ryngkat ka jingiatrei lang bad ka Labour Department, ki Village Defense Parties bad ki shnong ki thaw bad kumba long haduh mynta, la lah ban thaw ia kumba khatwei tylli ki District Task Force ban pynsuk iaka jinglap ia ki mynder ri bad ban pynphai pat iaki sha ka ri kaba ki wan.
‘Naduh u snem 2021 tad haduh ka 3 tarik jong u bnai Rymphang mynta u snem 2026, haduh 658 ngut ki nong Bangladesh kiba wan rung beain sha ka ri India la ioh ban kem haka jylla bad ka Ingbishar kala rai pynshitom ruh iaki katkum ki kyndon jong ka ain’ la ong u Bah Prestone Tynsong
