Shillong, Rymphang 17: U Myntri Rangbah ka jylla u Conrad K Sangma mynta ka sngi u la pyntip ba ka sorkar kala thung 36 ngut ki nong ai jingmut shimet (Consultant) bad 59 tylli ki kompani kiba ai jingmut sha ka sorkar ban ïarap ha kaba ïadei bad ka jingpynïaid bad pyntreikam ïaki kam pynroi.

U la ïathuh ruh ba ka jinglut baroh shisnem ha ka jingsiew man u bnai na ka bynta ki nongai jingmut shimet ka long T.4.35 klur na ka bynta u snem 2024-25, la ong u Sangma, ryngkat ka jingpynshai ruh ba ïaki kompani kiba ai jingmut sha ka sorkar kim ioh tulop hynrei ioh da ka jingsiew kumba la the kular bad lada kim lah kim ioh jingsiew satia.

Haba jubab ïa ka jingkylli na u Bah Heaving Stone Kharpran MLA ka liang pyrshah jong ka VPP na Mawryngkneng, u myntri rangbah u la kdew ba 19 ngut na ki 36 ngut ki nongai jingmut shimet ki dei ki riew shemphang na kane ka jylla bad kiba don ïa ki jingnang jingstad kaba pura bad katba ngi dang ïaid shaphrang ngin pynthikna ba ki briew jong ngi ruh ki lah ban shim ïaka jingkitkhlieh kaba ïaryngkat bad ki riewstad ka pyrthei.

U la ong ruh ba kiba bun ki nongai jingmut ki shah haki project bapher bapher na ka bynta ki kam ba kyrpang kum ka jingpynkhreh ïaki DPR, ki jingïada ïa ka mariang bad ka imlang sahlang, bad ki rukom thied ïaki tiar ki tar kumba la bthah da ka World Bank bad ka ADB.

“Ym lah ban knieh noh ïa ka bor ba la ai ha ki ophisar sorkar. Kitei ki kompani ki wan tang ban kyrshan ïaka kam ym ban tuklar ïaka kam jong ki ophisar” u la pynshai da kaba bynrap ruh ba ka jylla Meghalaya ka dei kawei naki jylla ba rit eh kaba la kiew shaphrang ha kaba ïadei bad ki kam pynroi kiba wan nabar.

Namarkata kitei ki consultantla thung ïaki haki project bapher bapher bad ka kam jong ki kan kut tad ynda kitei ki project kin kut, u la bynrap.