Mairang, Jylliew 20: Ka ophis treikam jong ka District Tuberculosis Officer West Khasi Hills District, ha ka 19 tarik u Jylliew 2024 ki la pynlong ia ka prokram ban sam ia ki jingbam sha ki 8 ngut ki nongpang TB kiba dei napoh ka Mairang Community Health Centre (CHC) kaba hap hapoh Eastern West Khasi Hills District bad ia kane Ka jingsam jingbam la pynlong lyngba ka Pradhan Mantri TB-Mukt Bharat Abhiyaan kum shibynta ban iarap ia ki nongpang TB ba kin ioh ia ki jingbam kiba tei ia ka met bad khnang ba kin lah ban ioh ruh ia ka met kaba koit kaba khiah.
Ha kane ka prokram la wan ban iadonlang ka Dr. F. Marbaniang, MO Ayush Mairang CHC kum ka kongsan ha ryngkat ka Kong. B.B. Nongrum, State Nodal Officer PMTBMBA, Meghalaya, u Bah G. Lyngdoh, District Programme Co-ordinator, NTEP West Khasi Hills, ka Kong Ibaiarilin Tham, PIRAMAL Foundation bad kiwei kiwei de.
Ha kane ka sngi la sam ruh ia ki jingbam teimet sha ki 8 ngut ki ba don ia ka jingpang TB, bad kane ka long kum ka jingkyrshan ba ki dei ban ioh ia ki jingbam ba tei met khnang ban kin ioh noh ia ka jingkoit jingkhiah ryngkat ki jingdih tista ia ki dawai kumba la bthah da ki Doctor.
Haba kren ha kane ka sngi ka Dr. F. Marbaniang ka la ïathuh ba kane ka Pradhan Mantri TB- Mukh Bharat Abhiyan ia kaba la pyllait da ka President jong ka Ri India ha ka 9 tarik Nailur 2022 da ka jingthmu jong ka ban wanrah ia ka jingïatreilang bad ban shim ïa ki lad jingsumar ban ïoh jingpynkoit na kane ka jingpang bad kala iathuh ruh ba ka Sorkar India ka la pyrshang katba lah ban pynkut noh ïa ka jingpang TB ha kaba kut jong u snem 2025 ha ka ri India baroh kawei namar kata kala kyntu ïa ki nongpang TB ba kin ai ka jingïatreilang bad ban shim ïa ki lad jingsumar ban ïoh jingpynkoit na kane ka jingpang.
