Shillong, Rymphang 19:  Ka Khasi Hills Autonomous District Council (KHADC) ka la kyntait ban pdiang ia ka jingtyrwa ban ai shuti ha ka 1 tarik u Naiwieng, kaba dei ka lyngkhuh sngi iap u JJM Nichols Roy, uwei na u nongialam uba la don bynta hakhmat eh ban wan rah ia ka sixth schedule hapoh ka riti synshar ka ri India.

Ia kane ka rai ban pynlong shuti ha katei ka sngi hapoh ka KHADC la wan rah da u Ricky Shullai, MDC ka Laban, da kaba u la pynpaw ba kane ka jingdawa ban ai shuti ha ka 1 tarik u Naiwieng, kaba dei ka lyngkhuh sngi iap u JJM Nichols Roy, ka long shi bynta ban burom ia une u nongialam uba la don bynta kaba khraw ban wan rah ia ka District Council ban aida ia ki hok long trai ki trai jylla.

Kane ka jingwan rah une u MDC ia ka rai ban ai shuti ha katei ka sngi kam shym la seisoh, namar bun ki MDC ki la pyrshah ia kane ka jingtyrwa.

U  Chief Executive Member ka kHADC, u Bah Winston Tony Lyngdoh u la ong ba kane ka jingtyrwa ban pynbna shuti ha ka jylla kam da long eh kaba donkam bad u la ai jingmut pynban ba ngi dei ban burom ia u JJM Nichols Roy halor ki matti kiba u la synniang na ka bynta ka jaid bynriew.