Nongpoh, Rymphang 21: Ki paidbah na kylleng ki shnong ha Ri Lum Khasi bad Jaintia, mynta ka sngi ki la tuid sha Madan ICAR kaba don ha Shnong Nongsder, kaba dei ruh ka jaka kaba la pynlong ia ka jinglehniam ba khatduh ia u Dr. Ricky AJ Syngkon.

Ha kaba nyngkong la don shwa ka jinglehniam hapoh ka iingsah u Dr. Ricky AJ Syngkon, hadien kata pat la rah ia ka met sha Madan ICAR Nongsder, ban pyndep ia ka lehniam ba khatduh, nangta pat ka rah noh ia ka met ban tep don burom ha u lum jingtep ka Balang Presbyterian Sumer Umbang.

Ïa la lehniam leh rukom ba khatduh ia ka met u Dr. Ricky AJ Syngkon, la leh da ki Pastor ha ryngkat ki Tymmen Basan, ki Rangbah Balang ka Balang Presbyterian Sumer.

Ha ka jinglehniam kaba khatduh ia u Dr. Ricky AJ Syngkon, nalor ka jingdon da ki phew hajar ngut ki paidbah, ki la don ruh ki heh ha ka sorkar jylla, kiba kynthup ia u Ma Sniawbhalang Dhar, Symbud Myntri Rangbah, u Dr. Mukul Sangma, Nongialam ka Liang Pyrshah, u Bah Ardent Miller Basaiawmoit, MLA Nongkrem bad uba dei ruh u President Rangbah ka VPP, nangta ki MLA, ki MDC lem bad kiwei.