Shillong, Jylliew 23: Katba ka jingmaramot ïaka jingkieng Umiam ka dang ïaid shaid shaid mynta, la khmih lynti ba yn pyndep noh shuwa u bnai Naitung mynta u snem ryngkat ka jingmana ïaki kali heh bad kali kitkhie kim dei ban ïaid lyngba katei ka jingkieng, la pyntip u CMD ka MeECL u Sanjay Goyal.
U la pyntip ruh ba shilliang jong ka jingkieng la dep ban maramot, bad shilliang ka jingtrei ka dang ïaid shaid shaid, bad ki dang don ruh ki kam kiba dang sah ban leh haki bynta ba shapoh jong ka jingkieng, bad ha kaba ïadei bad ka jingkhia jong ki kali hap ban ïa mir jingmut shuwa bad ka Indian Institute of technology Guwahati ba katei ka jingkieng kan nym duh bad haduh katno ka jingkhia ka dang lah ban shan.
Shuh shuh naka liang ka sorkar kan sa pyndait ruh da ki kor CCTV ha ki bynta jong ka jingkieng ban khanglad ïaki kali khia ba kin ïaid lyngba katei ka jingkieng bad kumba long haduh mynta ka jingmang naka bynta ka jingpynlut ban maramot ïa katei ka jingkieng kala poi kumba T. 24-25 klur.
