Shillong, Jylliew 21: U Conrad K Sangma, Chief Minister ka sorkar jylla, mynta ka sngi u la leit ban plie paidbah ia ka Malangkona Police Outpost kaba don hapoh ka shnong Malang Simnaguri, ka shnong kaba hap hapoh Mawshynrut Civil Sub Division jong ka West Khasi Hills District.
Haba plie ia katei ka Malangkona Police Outpost, nalor ka jingdon u Myntri Rangbah, la sakhi ruh da ka jingdon u Bah Prestone Tynsong, Symbud Myntri Rangbah bad uba dei ruh u Myntri uba peit ia ka tnat Pulit, nangta ka Kong Idashisha Nongrang IPS, DGP ka Meghalaya, u Bikram D. Marak, Superintendent of Police ka WKHD, u Bah Garod LSN Dykes Deputy Commissioner ka WKHD, kiwei ki heh ophisar sorkar lem bad ki riew rangbah jong katei ka thain.
Khyndiat halor katei ka Malangkona Police Outpost, ka dei kaba la tei lyngba ka skhim Police Infrastructure Renovation Fund (PIRF) ha ka jingpynmang tyngka kaba T. 17.5 lak, kata ka dei hadien ba katne snem, la shu pyndonkam ha ka ïingwai bad la ong ruh ba katei ka Police Outpost, ka dei kaba peit ia ki 19 tylli ki shnong kiba don ha ka thaiñ Malangkona.
U Conrad K. Sangma, haba u ai jingkren ha katei ka sngi, u la sngewkmen ba u la ioh ban leit plie paidbah noh ia katei ka Malangkona Police Outpost, kata ka dei ruh hadien bun bun snem ba ki briew na katei ka thain, ki la ap khmieh lynti ban ioh ia ka Police Outpost kaba paka ha katei ka thain.
Lyngba ka jingplie paidbah noh ia katei Police Outpost, kan da long shisha kaba pynkmen ia ki paidbah jong katei ka thain, namar ba ki paidbah kin ioh ia kata ka jingiada na ki Pulit kiba don hapoh katei ka Police Outpost bad khamtam eh ba katei ka thain ka dei ruh kaba don ha khappud bad ka jylla Assam.
HIAR MALANGKONA U CONRAD SANGMA, PRESTONE TYNSONG LEM BAD KIWEI BAN PLIE IA KA POLICE OUTPOST
