Shillong, Rymphang 27:  Hadien ba uwei u na u Area Commander ka HNLC na West Khasi Hills u la wan ban pyndem ia lade ha ki Pulit ka jylla, u Bah Prestone Tynsong kum u Myntri ka tnad ka kam pohïing ka jylla bad ba dei ruh u symbut myntri ka sorkar jylla, u la ong ba u Area Commander ka HNLC u la wan da lade ban pyndem ha khmat ki pulit ka jylla bad shen ki sa ia ka jingtip kaba bniah halor kane ka jingwan pyndem bad kiwei kiwei kiba la ioh ban kem da ki Pulit.

U la ong ruh ba kane ka jingwan pyndep u Area Commander ka dei ka lynti kaba bha tam bad u la kyrpad ruh ia kiwei kiwei ki dkhot ka HNLC ba maki ruh kin bud ia kane ka nuksa ban wan phai noh sha ka imlang ka sahlang kumba la leh da une u Area Commander.

U la ong ruh ba ka sorkar ka pdiang sngewbha ia ki ba kin wan phai noh sha ka imlang ka sahlang bad ruh na ka liang ka sorkar ka kloi ruh ban ai ka jingiada haba ki la wan ban pyndem ia lade ban trei na ka bynta ka imalang ka sahlang.

U la ong ruh ba haduh mynta ka jingkahng ka dang plie ia ki ba ki wan sha ka miej jong ka jingiakren bad ia kane ka shong ha ka mon ka jong ki.

Shuh shuh, u la bynrap ruh da kaba ong, ba ka sorkar ka don ban iarap ia ki bad ka sorkar ka pynshlur ruh ia ki ban wan phai noh sha ka imlang ka sahlang.

Kumba long haduh mynta mynta, u Bah Prestone Tynsong um shym la batai bniah halor ka jinglong jingman ka HNLC hadien ba la wan pyndem u Area Commander bad  na ka bynta ka jingtip kaba kham bniah ki Pulit ka Headquarter kin sa ai ia ia ka jingtip kaba kham bniah halor kane ka jingwan pyndem u Area Commander bad kiwei kiba la shah kem.