Nongpoh, Rymphang 27: Kawei na ka nongtrei jong ka USTM ba la tip kyrteng kum ka Julee Bezbaruah kala ujor syndon da ka ehajar ha ki pulit ka Jorabat Police Outpost hadien ba ka kali online lane ka UBER kala shah khang ha ki nongniah  Auto Rickshaw ha ka jingthmu jongka ban leit trei sha ka jaka trei kaba ka trei ha University of Science and Technology Meghalaya kaba don ha Jorpul Killing.

Kane ka jingjia ka la jia hynnin ka sngi ha kaba kane ka kaba trei  ha katei ka skul bah ka dang thmu ban leit sha ka jaka trei ha ryngkat ka kali kaba la shu book online,hynrei mar ia poi ha jaka ban kiew sha USTM bad ka ba dang hap haka surok bah katto katne ki nongniah Auto ki la pynsangeh iaka kali ba ka shong khlem ailad satia ba ka iaid shakhmat.

Na ka jingleh kine ki nongniah Auto Rickhshaw  ka la pynlong ia kane ka samla rangbah ban duh leit trei bad ban ujor syndon da ka ehajar sha ki Pulit ka Jorobat Police Outpost ba kane ka surok ka dang hap ha ka jingpeit jingkhmih jong ki Pulit na Jorobat.

Na ka jingujor ejehar kane ka Samla la ioh jingtip ba ki Pulit ka Jorobat ki la khot iaki nongialam jong kane ka kynhun niah Auto Rickshaw kaba don ha surok Killing ban kren sngewthuh bad ruh naka liang ka kynhun ki nongniah Auto ki la pyni ruh da ka jingthoh ba la mana iaki kali online ban iaid sha ka jaka ba don kane ka skul bah, namar ka pynduh kamai iaki nongniah Auto lada ailad ia kine ki kali online ban iaid hakane ka jaka.

Shuh shuh, na ka liang ki Pulit ka Jorobat ki la pynsgewthuh ruh ia kine ki nongniah Auto Rickshaw ba kim de ba shim ia ka ain ha ki kti bad lada don kano kano ka jingeh jong ki, ki dei ban pyntip sha ki pulit lane ujor sha ki MVI khnang ba kan nym pynmih kano kano ka huri hura kaba ktah ia ki paidbah.