Nongpoh, Rymphang 27: Ban dang bteng ka jingshakri na ka bynta ki paidbah ka dong Ri Bhoi hapoh ha ka jylla, ka Confederation of Ri Bhoi People (CoRP) mynta ka sngi ka la pynthymmai biang ia ki nongkitkam ka seng, kaba dei hadien ba u President ba rangbah u Bah Bandari Ryntathiang u la shongthaid noh na ka kam shakri hapoh ka seng.

U Bah Pateng Myrsing uba dei u working President barim ka CoRP u la shimti kum u President ba rangbah ka seng bad la pynskhem ruh mynta ka sngi ha ka jingialang kaba la long ha Auditorium Hall ka Umsning Town Durbar ha Umsning.

Ki nongialam ba hakhmat ka seng ba la jied thymmai ki kynthup ia u Bah Pateng Myrsing kum u President, Juban Swer bad u Bah Gershome Hat kum u Vice President, u Bah Markus Makri General Secretary lem bad kiwei kiwei, ha kaba ia kine ki nongialang ba thymmai la pynskhem bad pynbam smai da u Bah Bandari Ryntathiang kum u president ba la shongthaid na ka seng.

Ha kane ka jingpynskhem bad pynbam smai ia kine ki nongialam ba thymmai ka seng la wan ban shm bynta da u Bah A.L Hek MLA ka Pynthor kum u kongsan bad la sakhi lang ruh da ka jingdon lang u Additional SP ka Ri Bhoi u Bah Orville Masar, u Bah Rocky Kylla Chairman ka Umsning Town Durbar, u Bah Roykupar Synrem President ka CoMSO bad HYC lem bad kiwei kiwei ki riew rangbah.

Ha kane ka sngi la ai jingkren naduh u Bah A.L Hek kum u kongsan bad kitei ki riew rangbah ha kaba ki la ai ia ki kyntien sneng ki kyntien kraw ba kine ki nongialam ba thymmai ki dei ban shim ia ka jingkitkhlieh na ka bynta ban shakri kham bha iaki paidbah ka Ri Bhoi.