Nongpoh, Rymphang 27: Ha ka 23 tarik mynta u bnai, ka kynhun ki Pulit Ri Bhoi DEF lem bad ka Anti- Terrorism Squad, ki la leit ban khynra bad kem noh ia u Bah Benjamin Sohtun, 35 snem ha shnong Pahamlapong, ha kaba ka jingleit khynra ki Pulit ia katei ka iing ka dei hadien ba ki la ioh jingtip, ba utei u rangbah, u donkti ha ka ban pynrung bad pynbiej ia ki samla ba kin pyniasoh sha ka seng kiengatiar ba la shah khein beain ka HNLC, da kaba pyndonkam lyngba ki rynsan Social Media.

Haba ki Pulit ki la ioh ban kem ia utei u rangbah, ki la lap ruh ia ki sakhi satar bad kumta haba ki la tohkit bha ia utei uba la shah kynnoh donkti bad ka HNLC, utei u rangbah u la phla pat sa ia ka kyrteng jong u Jenesis Sohkhwai, 23 snem ka rta na ka shnong Umsohbar, Ri Bhoi Sepngi, uba la shah kem noh ha ki Pulit ka Patharkhmah Police Station ha ka hynnin ka 26 tarik u Rymphang, kata hadien ba ki la lap ba u don ia ka jingiasyllad bad u Benjamin Sohtun, na bynta ban pynbthei ia ki Bom IED (Improvised Explosive Device).

Halor katei ka jingjia, la Rejister case ha Nongpoh Police Station katkum ka Case No.15(2)2026 hapoh ki section U/S 113(3)/147/148 jong ka BNS.

Ki Pulit kin dang pynlong ia ka jingtohkit kaba bniah bad kin dang wad ne thwet shuh shuh ia kiwei pat kiba la shah suba bad ki don ka jingiadei bad u Benjamin Sohtun.