Nongpoh, Rymphang 28: Ka la pynkmen shikatdei eh ia kawei ka longiing baduk hapoh ka shnong Kalapangti, kaba hap ha Umroi Constituency, kata ka dei hadien mynta ka sngi, ba Bah Damanbait Lamare, MLA Umroi, u la leit ban aiti ia ka iing kaba u la pynshna sngewbha sha katei ka longiing kaba don 10 ngut ki khun.

Ia kane ka iing ba la leit ban aiti da u Bah Damanbait Lamare, ka dei ka iing jong u Bah E. Mukhim bad ka Kong N. Lyngdoh, ha kaba u MLA u la pynshna ia ka iing kaba don 6 kamra, nalorkata u la pynshna ia ka painkhana bad pynbiang ka bording ha katei ka iing.

Haba plie ia katei ka iing, nalor ka jingdon u MLA, la sakhi da ka jingdon u Bah S. Pakyntien, Officer Incharge ka Khapmara, PIC, u Bah T. Rynjah, Rangbah Shnong Kalapangti, u Bah Pynskhemlang Sun, President NPP Raid Madan Kyrdem lem bad shibun kiwei pat.

U Bah Damanbait Lamare, haba u ai jingkren ha katei ka sngi, u la ong ba haba long kum ki nongmihkhmat kam dei eh ban don tang ia kata ban kamai shimet ne ban biang tang ïalade, hynrei ka donkam eh ban pyrkhat kyrpang bad pynioh jingiarap na bynta kito ki longiing kiba im ha ka kyrduh bad kiba kynduh jingeh.

Shuh shuh, u la ong ruh ba ka iing ka sem jong u, ka dei kaba ki ïarap ia kiba mat ha ka duk ka kyrduh bad ia kata ka dei kaba ki ju leh naduh mynshwa, kata naduh ka por ba long MLA u Ma Sniawbhalang Dhar, u Ma Ngaitlang Dhar, ha kaba ki ju ïarap na bynta kito ki longiing ba duk bad kiba donkam shisha ban ïoh jingiarap