Nongpoh, Rymphang 28: Ban pynurlong ia ka thong jong u Narendra Modi kum u Myntri rangbah ka ri bad kiwei ki kam pynroi ban kyntiew ia ka ri India lyngba ki skhim bapher bapher ba ka sorkar ka iarap sha ki paidbah bad ba ka kham phai khmat sha ki nongrep bad ki riew paidbah, ka State BJP bad ka BJP State Kisan Morcha mynta ka sngi ka la pynlong da ka jingialang ban jied ia ki nongkitkam ka District Kisan Morcha bad ruh ki Mandal Kisan Morcha ha ki 5 tylli ki Constituency kiba don ha Ri Bhoi.

Ia kane ka jingialang ban jied ia ki nongkitkam ki Kisan Morcha ha ka District bad ki Mondal la pynlong ha Gladden Tower Nongpoh ha kaba la wan ban don ryngkat naduh u Secretary ka State BJP u Bah Wankit Pohshna, u State President ka Kisan Morcha u Bah Duruth Majaw, U P.S Toor General Secretary ka State Kisan Morcha, u Bah Donlang Nongbri State Secretary ka Kisan Morcha lem bad kiwei kiwei ki nongialam ka BJP.

Ki nongialam ka District BJP Kisan Morcha ha Ri Bhoi ba la pynskhem mynta ka sngi ki kynthup ia u President u Bah Jinon Syngkli, Vice president u Bah D. Maring, General Secretary u Bah Blanting Namsaw, bad u Vice president u Bah Drowel Maring.

Ki nongialam ki Mandal Kisan Morchah ki kynthup ia u Bah Suni Manih ba la jied kum u President ka Nongpoh Mandal, u Bah Simon Lapang President ka Jirang Mandal, u Bah Akbar Rongpeit President ka Mawhati Madal, Arbistar Kharthangmaw President ka Umsning Mandal bad u Bah Precious Mador President ka Umroi Madal.

Haba ai jingkren ruh hakane ka sngi, u Bah Wankit Pohshna kum u General Secretary ka State BJP, u la khot la wer ia ki paidbah bad khamtam ia ki nongrep ba kin wan ban kyrshan ia ka BJP na ka bynta ban pynurlong ia ka thong u Mytnri rangbah ka ri u Narendra Modi bad shibun ki thong kiba ka BJP ka kwah ban kyntiew ia ka ri India da kaba phai khmat nyngkong eh sha ki nongrep bad sha kito ki longing kiba donkam shisha ka jingiarap na ka sorkar.

U la ong ruh ba ka sorkar BJP ka don ia ka thong ban kyntiew ia ka ri India kum kata ka ri kaba kiew shaphrang ha ka pyrthei bad lada ki paidbah kim pat kiew shwa ha ka ioh ka kot khamtam ki nongrep bad ki riew paidbah ka long kaba eh ban pynkiew ia ka ri India ha ka liang ka roi ka par bad ka ioh ka kot.

Shuh shuh, u la khot la wer ia ki paidbah bad ki nongrep ba kin ai kataka jingkyrshan ia ka BJP khnang ba lada ka BJP ka don ha ka bor kan lah ban pynurlong ia baroh ki jingangnud jong u Narendra Modi ban wan rah ka jingkylla ha ka ri bad ruh ban pynlong ia ka ri India ka riew kaba la kiew shaphrangha ka pyrthei, u la bynrap.