Nongpoh, Lber 01: Kawei ka longkmie kaba dang 27 snem ka rta bad kaba la tip kum ka Absana Khatun, na Darrang District jong ka jylla Assam, ka la khlad noh hashen, kata hadien ba ka la shah iuh ha ki bynta ka khlieh ha kawei ka kali bad kaba la jia ha ki bynta ka surokbah NH-6 ha 12mer, Byrnihat, Ri Bhoi.

Katei ka jingjia, ka la jia mynta ka sngi ha ka por 3 baje eiei janmiet, ha kaba katei ka longkmie, ka la shah syllad bad shah iuh ha ki bynta ka khlieh, kaba la pynlong ia katei ka longkmie ba kan duhnoh ia la ka jong ka jingim, katba katei ka kali kaba la iuh ia katei ka longkmie, ka la phet krad beit bak na katei ka jaka.

Katei ka jaka ba la jia ka jingshah syllad bad shah iuh ha ki bynta ka khlieh, ka la jia ha ka liang jong ka surok ban hiar sha Guwahati.

Ia ka Metiap jong katei ka longkmie, la rah noh sha Civil Hospital, Nongpoh, na bynta ban pyndep ia baroh ki jingdonkam kiba katkum ki kyndon Ain.