Khliehriat,Lber 01: Ka Taiew lehkmen ba shi Taiew lynter jong ka Don Bosco College, Byndihati, kaba la tip kum ka Annual College Week-“SYNORA”-2026, la ïoh ban pynkut noh hynnin ka sngi Saitjain hapdeng ka jingshongkun, kata da ka jingwan iashimbynta da ki samla pule ha katei ka College ha ryngkat ka jingwan shimbynta da ki spah ngut kiwei pat ki samla ba pule ha ki College bapher bapher kiba don ha ki jylla shatei lam mihngi.

Ha katei ka Taiew lehkmen ka Don Bosco College, la don shibun ki jait jingialehkai bapher bapher, kiba long kum ki jingiakop hapdeng ki samla pule bad ha katei ka Taiew lehkmen, la wan ban iashimbynta da ki 300 ngut tam ki samla pule na ki jaka bapher bapher jong ki College kiba don shatei lam mihngi.

Haba pynkut ia katei ka Taiew lehkmen ki samla ka Don Bosco College, la sakhi da ka jingdon u Dr. Evarist Myrsing, Asst. Project Director HRDS-INDIA, New Delhi, uba dei ruh u CEO ka Ryntih Sports & Cultural Club, Shillong kum u kongsan bad u Rev. Fr. Jeevan K. Lakra, SDB Vice- Provincial ka St. John Paul II Province, Shillong  kum u symbud Kongsan, ha ryngkat ka jingdon u Rev. Fr. Daniel D. Cajee, SDB u Principal, u Rev. Fr. Glorious T. Shullai, Vice-Principal lem bad kiwei.

Ha kane ka sngi, nalor ba la sam ruh ia ki khusnam sha ki samla pule kum ka jingpynshlur ia kito kiba la jop ha ki jingialehkai bapher bapher, u Dr. Evarist Myrsing kum u kongsan u la bet ruh ia ki symboh pyrkhat sha ki samla pule ba kum ki samla pule ki hap ban don ia kata ka thong ha ka jingim da kaba ki hap ban trei shitom ha ki jingpule khnang ba kin lah ban poi sha ka thong jong ka jingim.

Kum uwei na u Samla rangbah u Dr. Evarist Myrsing u la kyntu ruh ia ki samla pule ba pynleit jingmut ha ki jingpule bad ha ki kam ki jam jongki bad dei ruh ban kiar na kino kino ki jingdih basniew khamtam u Drok uba la pynjot ia bun ngut ki samla ba lui lui jong ka jylla.