Shillong, Lber 03: Hadien ka jingtyrwa ïaka kyrteng u Dr Batskhem Marboh kum u kyrtong ka elekshon shiteng samoi jong ka Shillong Lok Sabha Seat, ban mih bujli haka jaka jong u Dr Ricky AJ Syngkon u ba la khlad kyndit na kane ka sla pyrthei namar ka jingshitom ba kynsan, u Dr Batskhem u ba dei ruh u nongai ktien ka party VPP u la pynpaw ba kum u nongtrei ba shitrhem jong ka party u pdiang ïa kane ka rai ba ka party kala shim watla ka dei ka jingkit kaba khia.

Haba kren sha ki lad pathai khubor u Dr Batskhem u la pynpawka jingsngewnguh ïaka party kaba la shañiah ha u ban shim ïa kane ka lyngkor kaba khia hadien ka jingkhlad noh u Dr Ricky AJ Syngkon bad kular ruh ban rah ïaka burom jong ka party kumba ka VPP kala thaw record naduh u snem 2023 bad ka jingjop donburom jong u Dr Ricky AJ Syngkong ka rah ruh ïaka burom jong ka party.

Haba kren shaphang ka elekshon shiteng samoi la u don jingkyrmen ne em ban jop u Dr Batskhem u la ong ba un nym kheiñ sting ïaka elekshon namar kano kano ka elekshon ka dei ka elekshon bad ka don la ka jong ka jinglong bad ngi hap ban shim khia bha ïa ka ryngkat ka jingkyrpad ïaki paidbah ba kim dei ban jied da ka jingsngew hynrei ban peit thuh ïaka lawei jong ka jylla.