Nongpoh, Lber 04: Ki nongialam ka National People’s Party (NPP) Ri Bhoi District, mynta ka sngi ki la pynlong ia ka jingkynmaw burom na bynta ka lyngkhuh sngi iap ba shiphew snem jong u Purno Agitok Sangma, uba long kum u nongseng ia ka NPP ha Meghalaya bad uba la khlad noh ha ka 4 tarik u Lber jong u snem 2016 ba la kynjoh sha ka shiphew snem ba ka party ka la duh ia une u nongialam.

Ha katei ka jingkynmaw burom ia ka lyngkhuh sngi iap u Purno Agitok Sangma, la sakhi da ka jingdon ki MLA ka NPP, kiba kynthup ia u Bah Sosthenes Sohtun, MLA Jirang, uba dei ruh u Myntri Sorkar, u Bah Damanbait Lamare, MLA Umroi, u Bah Charles Marngar, MLA Mawhati, ka Kong Rona Khyndeit, MDC na Nongpoh, u Bah Clement Mawlong, President NPP Ri Bhoi lem bad kiwei.

Haba ai jingkren ha katei ka sngi, ki nongialam ka NPP, kiba kynthup ia u Bah Sosthenes Sohtun, MLA Jirang bad u Babu Clement Mawlong, President NPP Ri Bhoi, ki la ong ba ha ka jinglap jong ki u PA Sangma, u dei uba briew uba sngewrit bad khlem da don kano kano ka mynsiem ban iashah shilliang, hynrei u niew kajuh ia baroh.

Katba na ka liang u Bah Sosthenes Sohtun, uba dei ruh u Kyrtong ba nyngkong ka NPP uba la iakhun ha u snem 2013, u la ong ba ha ka jingiakynduh kaba lyngkot hapdeng jong u bad u PA Sangma, nga lap ba u PA Sangma, u dei uba sngewrit bad uba trei na bynta ka bha ka miat jong ki paidbah.

Ia u PA Sangma, la ithuh bad tip ha baroh ka ri India, ha kaba u la long ruh kum u Speaker ka Lok Sabha, kum u Myntri Sorkar Pdeng, Myntri Rangbah ka Sorkar jylla bad uba la iakhun ruh ban long kum u President ka ri India bad uba donhok ban ïoh ia ka jingiaroh, la bynrap u Bah Sosthenes Sohtun.