Nongpoh Lber 4: Ka Village Defence Party jong ka Shnong Quinine Nongladew Ri Bhoi District hapoh ka jingialam u Bah Lansius Syiemlieh President VDP mynta ka sngi ki la leit ban jurip ia ka wah Umran ha ki bynta kiba dang hap ha pud u sam jong ka Shnong Quinine Nongladew bad naka Liang ka VDP Quinine Nongladew kila maham jur ruh ia ki briew kiba wan sha katei ka jaka ba kim dei ban pynmih kino kino kiba ktah ia ka shong suk shong sain ha ka Shnong ka thaw bad ki la maham ruh ia ki Briew ba kim dei ban bret bilor kyiad ne pynjaboh ha katei Wah Umran.

Kane ka jingmaham kala mih hadien ba naka Liang ka VDP kila lap ba ki Don ki Briew kiba juh sngwtynnd ban wan shongkai sha katei ka jaka da kaba juh pynlong kum ka jaka ia leh sngewbha bad ki juh kren ki ktien sih ktien sang bad kiwei kiwei kiba ktah iaka shong suk shongsain ha ka Imlang sahlang.

Haba kren sha ki ladpathai Khubor naka Liang u Bah Lansius Syiemlieh u la ong ba na ka Liang ka VDP kila buh daki Signboard ban maham iaki Briew kiba wan sha katei ka jaka hynrei ki Don pat ki briew kiba la dusmon daka pynjah bad phut ia kitei ki Signboard ba la buh da ka VDP namar kata na ka Liang ka VDP kim ban seh ban shim da kane ka sinjam ban pyntip lyngba ki ladpathai Khubor sha baroh ki Paidbah kiba wan sha katei ka jaka ba ki dei ban burom bad lehkhuid ia katei ka jaka.

Na ka Liang u Bah Lansius Syiemlieh President VDP bad ka Kong Nita Thongni  ba dei trai jong ka pynthah kba kaba don ha rud jong katei ka wah umran ki long ba kim khang ia ki Briew kiba juh wan ban saitjain sha katei ka wah ne ban wan shongkai ha katei ka jaka hynrei ki buh pat ka jingkypat ba kim dei ban leh khlemakor ia katei ka jaka da kaba bret pathar ia ki jaboh, ki bilor kyiad bad Kiwei kiwei.

Ha kane ka juh ka sngi na ka Liang ka Village Defence Party jong ka Shnong Quinine Nongladew Kum shibynta ban pyneh pynsah ïaki doh um doh wah, naka Liang ka VDP kila buh ruh ka  jingmaham ïaki paidbah ba kim dei ban pynïap ne ban leh dusmon ïaki dohkha haki wah da kaba ber dawai ne kiwei kiwei kiba ktah ia ki doh wah hynrei ban pynneh pynsah ïaki.