Kingstown, Jylliew 23: U Captain ka kynhun ialehkai Kriket jong ka Australia u Mitchell Marash u la pynlyngngoh hi ngaiñ ia ki paid ieid kriket kiba kyrshan ia kane ka kynhun, hadien ka jingshim rai jong u ban leit bowling shwa hadien ba la jop ia ka toss ha ka madan ialehkai kriket jong ka Kingstown, St. Vincent kaba baroh baroh ki riew shemphang halor ki madan ialehkai (pitch) ki ju rai ban batting shwa ha kane ka madan, kane ka rai ka la ialam ruh sha ka jingshah rem noh ka kynhun Australia ha ka kynhun kaba dang sdang kiew ha ka kriket kata ka ri Afghanistan ha ka jingiakhun jong ka thup Super 8 jong ka T20 World Cup kaba dang iaid shakhmat.
Ka kynhun jong ka Afghanistan ka la pynliem ia ka Australia da 21 runs ha ka Super 8 jong ka T20 World Cup mynta ka 23 tarik Jylliew ha Kingstown, St. Vincent bad kane ka dei ruh ka sien kaba nyngkong bad ban sah jingkynmaw na ka bynta ka kynhun Afghanistan ban lah ban pynliem ia ka Australian ha ki lympung ialehkai Kriket.
Kumba long ka kaiphod, jong ka Group 1, kaba kynthup ruh ia ka kynhun jong ka India bad Bangladesh. Ka Australia kan hap ban iakhun tyngeh pyrshah ia ka India ha ka jingiakhun ba khatduh jong ka thup Super 8 ban ioh rung sha ka semi-final.
Lah ban kdew, ba ka Afghanistan ka la lah ban pynliem ia ka Australia kumba lait ksuid hadien ka jingshah khyrwit nyngkong ha u Glenn Maxwell u ba tied 59 run na ki 41 balls bad wat u Pat Cummins u ba la khyrwit ia ka hat-trick, kata ha ki ar tylli ki jingiakhun, da ka jingialehkai bha kine ki rangialehkai ka Australia nyngkong ka la pynkhihwin ia ka Afghanistan.
Hynrei, la iohi pat ba ka Afghanistan ka la lah ban wanphai biang da ka jingkyrmen ban ioh jingjop ha kane ka jingiakhun lyngba ka jingtied runs hapoh ka 10-over lyngba ki 10 wickets ba ka don, ha kaba Rahmanullah Gurbaz u la tied 36 khlem out bad u Ibrahim Zadran u ba la tied 22 khlem out bad ialam ia ka Afghanistan sha ka 64 run khlem don ba out napdeng ki nongtied run bad ban pynliem ia ka Australia da kaba kamai 148 bad out noh 6 ngut ki nongtied jong ka.
LEH NOHEI KA HAT-TRICKS U PAT CUMMINS NABA LIEM KA AUSTRALIA HA KA AFGHANISTAN HA KA THUP SUPER8//T20 WORLD CUP
