Shillong, Jylliew 23:
Ki pulit ka jylla lem bad ka kynhun Search & Rescue Team (SRT) mynta ka sngi, ki ioh ban sei noh ia ka met jong uwei u samla na ka jylla Assam, u ba la ngam jyllop ha ka wah Aradonga hynnin ka sngi, hadien ka jingleit sum sha katei ka wah lem bad ki paralok.
Katkum ka tyllong khubor ba la ioh lum, la iathuh ba utei u samla uba la tip kyrteng kum u Dhrubajyoti Kalita na ka shnong Chayagaon jong ka Kamrup District ka jylla Assam, u la leit kai pyngngad sha katei ka wah Aradonga kaba don ha Mawkhrang Picnic Spot jong ka West Khasi Hills District lem bad saw ngut kiwei de ki paralok ki jong u.
La iathuh ba utei u samla u la leit ban sum sha katei ka wah Aradonga bad kumta hi, u la shah kit ha ka um bad jah syndon na katei ka jaka. Na ka liang jong ki briew shnong kiba la ioh jingtip ia katei ka jingjia, ki la pyrshang ban wad ia utei u samla, hynrei kim lapdien shuh.
Na ka liang ki bor pulit lem bad ka kynhun SRT ki la pynlong ka jingwad ia ka met jong utei u samla naduh hynnin ka sngi, bad dei tad haduh mynta ka step jong ka Sngi U Blei, ba la ioh noh ban sei ia ka met jong utei u samla uba la iap jyllop ha katei ka wah ha ki khappud jong ka jylla Meghalaya bad Assam.
