New Delhi, Jylliew 23:
U myntri rangbah ka jylla Meghalaya, u Conrad K Sangma mynta ka sngi, u la leit ban iuh kjat sha ka nongbah Delhi na ka bynta ban pyniaid iew ia u sohtrun ka jylla ha ki dukan die soh die pai jong ka kompani Safal Mother Dairy ka nongbah Delhi, ha kaba ki paidbah katei ka thain, naduh mynta ka sngi, ki lah ban thied ia u sohtrun ba pynmih na ka jylla ha kitei ki dukan jong katei ka kompani.
Kum ban shu kdew, ka Safal Mother Dairy kadei kawei na ki kompani kaba don haduh palat 400 tylli ki dukan die soh die pai, ka dud, ki jhur ki jhep bad kiwei kiwei de ha kylleng ki sor jong ka ri India ba kynthup naduh ka Delhi, Bangalore, Noida, Ghaziabad bad Gurgaon, bad ia kine ki dukan, la pyniaid da ki shipai kiba la shongthait lane ki bahaing hasem ki jongki.
U Conrad K Sangma u la ong ba kane kadei ka jingsdang jong ka jingurlong ki jingphohsniew jong ki paidbah nongrep, ban pyniaid iew ia ki mar rep ki jongki lyngba ka jingkyrshan ba radbah jong ka sorkar jylla. “U Sohtun uba shngiam u jongngi, mynta lah ban ioh na ki dukan die soh die pai jong ka Safal Mother Dairy ha ka nongbah Delhi” la ong u Conrad K Sangma.
Ha kane ka sngi, u Conrad K Sangma u la iakynduh ruh ia u Managing Director jong ka Mother Dairy, u Manish Bandlish lem bad ia u Shripada Hedge na ka bynta ban ia mir jingmut kumno ban nang pyniar shuh shuh ia ka jingiatreilang ban pyniaid iew ia ki mar rep kiba pynmih na ka jylla.
