Nongpoh, Lber 23: Hadien ki prokram bapher bapher kiba la pynlong ha ki sngi ba la dep, ka District Water and Sanitation Mission (DSWM) lyngba ka Jal Jeevan Mission (JJM) Ri Bhoi District mynta ka sngi ka la rakhe kyrpang ïa ka World Water Day ha District Library, Nongpoh.

Ha kane ka sngi, la wan shim bynta da u Deputy Commissioner ka Ri Bhoi, u Abhilash Baranwal kum u kongsan, ryngkat bad u Executive Engineer ka tnad PHE u Bah U. Kurbah, ki ophisar sorkar, ki rangbah shnong, ki khynnah skul bad ki paidbah na ki bynta bapher bapher.

Na ka liang ka tnad PHE, la pynkup burom ruh ïa ki katto katne ki skul kiba la shim bynta ha ka jingïaid paidbah (rally) ban pynsngewthuh ïa ka jingdonkam ban pynneh pynsah ïa ka um bad ban sumar ïa ki tyllong umdih. Kane ka jingïaid paidbah ka long shi bynta ban pynsngewthuh paidbah ba ka um ka dei ka jingim bad ka jingkyrkhu kaba dei ban ri bad sumar na ka bynta ki pateng ban wan.

Haba ai jingkren, u Deputy Commissioner u la pynkynmaw ba ka um kaba ngi pyndonkam mynta ka dei ka juh ka um kaba la don naduh ki por mynshuwa, bad ka long kaba donkam tam na ka bynta baroh ki jingthaw ba im ha kane ka pyrthei. U la ong ruh ba ka jingïada bad ka jingpynneh pynsah ïa ka um kam dei tang ka kam jong ka sorkar hynrei ka dei ka jingkitkhlieh lang jong baroh ki nongshong shnong.

U la kyntu ïa ki paidbah ha jylla ba kin pyndonkam hok ïa ka um, ban ym pynlehnohei bad ban sumar ïa ka mariang bad ki tyllong um, namar khlem ka um ym lah ban don jingim ha kane ka pyrthei