Nongpoh, Lber 23: Ka jingwan poi ki khynnah haduh 140 tam ban pynrung kyrteng ia lade ha ka Ri Bhoi Cricket Academy ba la pynlong mynta ka sngi ha Madan ka St. Michael Higher Secondary School Umsning ka la pynkmen shi katdei eh ia ki nongialam ka Ri Bhoi District Cricket Association bad ka thong jong kane ka jingpynrung kyrteng ka long ban sei madan ia ki sap ki phong ki khynnah na ka bynta ban dang pyntbit ia lade ha ka jingialehkai Cricket.

Ha kane ka jingpynrung kyrteng ia kitei ki khynnah sha ka Ri Bhoi Cricket Academy la don ryngkat naduh u President ka Ri Bhoi District Cricket Association u Bah Rayonald Kharkamni, u working Preisident u Bah Ferdynald Kharkamni, u Secretary u Bah Michael Kharhunai, u Fr. Pius Shadap u Parish Priest ka Umsning bad kynthup kiwei kiwei ki nongialam ka Association.

Ha kane ka snig, nalor ka jingpynrung kyrteng ia kitei ki khynnah ha ka Ri Bhoi Cricket Academy, na ka liang ka Association ka la pynkup burom ruh ia ki 16 ngut ki State Player kiba dei na Ri Bhoi District bad ruh la ia soi ia ka soskular (MOU) bad ka St. Michael Higher Secondary School Umnsing kiba la ai kylluid mynsiem ban pyndonkam ia katei ka madan na ka bynta ban pynlong kum ka jaka ai jinghikai ia ki Khynnah lyngba ka Ri Bhoi Cricket Academy.

La ai mynsiem ruh ia kine ki khynnah kiba la pynrung kyrteng ha kane ka sngi daka jingdon lang ki Coaches kiba kynthup ia u Coach ka BCCI Leve-1 u Shankar Nawar, ki Coach ka MCA ha ka level O ba kynthup ia u Bah Badonnam Mylliemngap bad u Laxman Gurung.

Shuh shuh, ha kane ka sngi la ai jingkren ruh naduh kitei ki nongialam ka RBDCA bad kynthup ia u Parish Priest ka Umsning Parish, kiba la pynpaw ia ka jingkmen ban iohi ba bun ki khynnah ki la wna ban pynrung kyrteng bad ruh ban pynpaw ia kata ka jingangnud ba ialehkai Cricket kaba long kawei na ka jingialehkai kaba ai jingmynto na ka bynta ki khynnah kiba don shisha ia ka sap ka phong.