Shillong, Lber 24: Ki nongialam shnong bad ki paidbah kiba shong ba sah ha Block-1 bad kiba don hapoh ka shatri kaba la tip kum ka Hynniewtrep Border Dispute Redressal Forum (HBDRF), ki la pynbna ba kin sangeh shimbynta ha ki kam Ilekshon ne ka jingjied nongmihkhmat, nalorkata ki la byrngem ruh ban pynlong da ka jingiakhih pyrshah ia ka sorkar Meghalaya, namar ka jingleh kuman ban pynbeit ia u pud u sam uba thikna ha kito ki jaka ba khappud bad ka Assam.

Katei ka jingbyrngem iakhih ki paidbah bad byrngem ban sangeh shimbynta ha baroh ki kam Ilekshon ne ban jied nongmihkhmat, kata ka long ha ka kam ban jied ia ki nongmihkhmat ha ka Karbi Anglong Autonomous Council (KAAC), ki elekshon ha Assam ne ha kane ka MP Lok Sabha shiteng samoi na Shillong Seat, ha kaba ka daw jong ka jingbyrngem ki paidbah, ka dei namar ba ki kwah ban pynbeit noh mardor ia u pud u sam hapdeng ka Meghalaya bad Assam, ia kane la ong da u Bah Thomas Passah, Working President ka KHNAM bad uba la kren ha ka sur jong ka HDBRF sha ki lad pathaikhubor mynta ka sngi ha Nongbah Shillong.

Shuh shuh, u Bah Thomas Passah, u la kynnoh ba kane ka sorkar kaba la ialam da u Conrad K. Sangma, ka jied ia ka lynti ban sngapjar, watla bunsien ki briew na katei ka thain, ki la leit ban kynduh la bun bun sien, ba iakren halor ki kam khappud ha Block-1.

Kumba ka long mynta, ki briew na Assam ki shim kabu ia ka jingshah iehbein ki briew na Meghalaya kiba shong ba sah ha katei ka thain, namarkata na ka liang ka HBDRF, kan sa shim ia ka sienjam kaba tyngeh da kaba pynlong ia ki jingiakhih, kata lada ka sorkar Meghalaya ka iai sngapjar halor ka jingdawa ki paidbah jong katei ka thain Block-1, bynrap u Bah Thomas Passah.