MIH KA SYNJUK NA RI BHOI BAN PYNREM JUR HALOR KA JINGKREN LAMLER U MYNTRI

Nongpoh, March 26: Ki paidbah kiba ju pyndonkam ïaki tyndong Gas ban shet jingshet, dang step kila khohreh ryngkat ka jingkulmar jingmut ban leit shim Gas naduh jaka stock kaba don haka shnong Mawtnum ha Ri-Bhoi District bala sam da ka Ri-Bhoi Gas Agency namar ka jingsaphriang jong ka khubor kyrduh Gas khamtam haka jingbteng jong ka thma hapdeng ka US-Israel pyrshah ïaka Iran.

Halor kane ka bynta naka liang ka bor district jong ka Ri-Bhoi kala thaw ruh ïaka District LPG Supply Monitoring Committee bad la shong ruh ïaka jingïalang ba nyngkong mynta ka sngi hapdeng u DC ka Ri-Bhoi bad ki heh ophisar bad ki nongmihkhmat jong ki Gas Agency ban ïamir halor kane ka jingeh bad kumno ban weng ïaki.

Haba kren sha ki lad pathai khubor, naka liang u Abhilash Baranwal Deputy Commissioner ka Ri-Bhoi u la ong ba ka jingpoi Gas mynta kala duna haba nujor bad ki por ba mynshuwa kumta naka liang ka sorkar jylla kala bthah ruh ban thaw ïakawei ka committee kaba la tip kum ka District LPG Supply Monitoring Committee bad la shong ruh ïaka jingïalang ba nyngkong mynta ka sngi ban shim ïaki sienjam ha kaba ïadei bad kane ka jingeh bad bthah ruh ïaki Gas Agency ba kin pynbiang ïaki list jong kiba pyndonkam ïaki Commercial Cylinder khnang ban pynbiang ïaka jingdonkam jong ki.

Shuh shuh la ong ruh ba ki nongpyndonkam cylinder haki jaka sor ki lah ban book hadien 25 sngi katba kiba naki thaiñ nongkyndong ki lah ban book ïaki cylinder hadien 45 sngi bad la bthah ruh ïaki Gas Agency ba kin sam sha ki paidbah ym da ka jingshah liang hynrei katkum ka jingkloi jong ki ban book bad la kyrpad ruh ïaki paidbah ba kim dei ban kulmar jingmut ha kaba ïadei bad ka jingbymioh gas bad ba kin iaishah ïaka por kaba 25 bad 45 sngi kumba la buh namar naka liang ka sorkar ka shimkhia ban pynbiang ïaka jingdonkam ki paidbah.

Halor kane ka jingud bad ka jingkulmar jingmut jong ki paidbah ha kaba ïadei bad ka jingkyrduh Gas, la ioh ruh ban ïakynduh bad u trai jong ka Ri-Bhoi Gas Agency ban wad jingtip la ka don ne em ka jingkyrduh Gas kumba la ud da ki paidbah.

Haba ïakren bad u Bah Victor Maxx Rynjah Proprietor jong ka Ri-Bhoi Gas Agency u la ong ba ki paidbah kim dei ban khih mynsiem bad ban kulmar jingmut ha kaba ïadei bad ka jingbym ioh gas namar ki kompani kiba pynpoi Gas kila pynthikna ba kam don ka jingkyrduh Gas, watla ka rukom poi Gas kala kham duna namar ka jingbun jong ki paidbah kiba pyndonkam gas.

U la ong ruh ba naka liang ka Ri-Bhoi Gas Agency ka dei tang ka nongsam sha ki paidbah bad ka dei ka kamram jong ka sorkar ban pynthikna ba ka Gas kan poi thikna sha ki paidbah namar naka liang jong ki kila pyndep ïaka kamram ban book bad ban wanrah ïaki gas bad ban sam sha ki paidbah kat kaba poi haka por kaba biang bad ka jingeh hi ka dei ka jingkulmar jingmut jong ki paidbah ban book ïaki Gas.

Shuh shuh u dap ruh da ka jingsngewkhia ba ki nongpynpoi Gas sha ki iing briew (Delivery Boy) kila mad jingeh kaba khraw naka jingshah khñium bad shah tim haki paidbah, watla kam dei ka jingbakla jong ki hynrei ki don ruh hadpeng ka jingsyier, namar ki hap ban pynpoi shuwa sha kito kiba la dep book shuwa hashuwa.

Shuh shuh la ioh ruh ban ïakren bad uwei naki nongïalam ha Ri-Bhoi District u Bah BB Makdoh u ba dei ruh u Chairman ka Synjuk ki Rangbah Shnong Ri-Bhoi district ha kaba u la pynpaw ka jingsngewkhia kaba jur halor kane ka jinglong jingman bad ka jingeh ba mad da ki paidbah ba kim banse ban kulmar jingmut namar ka jingduna jong ka tyndong gas ban shet jinggshet bad kyrpad ruh sha ka sorkar ba kan shimkhia mardor bad ban weng ïa kane ka jingeh khnang ba ki paidbah kin nym lamwir bad kulmar jingmut.

U la bynrap ruh ba dang shen ka synjuk ka sngewlyngoh halorka jingkren  u Myntri sorkar sha ki lad pathai khubor ba ym don kata ka jingduna ki tyndong gas shed jingshed ha ka jylla, hynrei kumbalong mynta pat ki paidbah ki mad jingeh ba kyrduh ban ioh ia ka tyndon gas shed jingshed kumba la sakhi ha Ri Bhoi District.