Shillong, Lber 26: Na daw ka jingkren paidbah u Chairman ka Confederation of Meghalaya Social Organization (CoMSO) u Bah Roykupar Synrem kaba la saphriang ha ki rynsan social Media, kaba dei ruh ka jingkren paidbah ha ka jingïalang kaba la dep ban long dang shen ha Motphran, ki Pulit ka Sardar Police Station lyngba  mynta ka sngi ki la khot hajir ïa u Chairman kaba dei hadien ba uwei u SI na Lumdiengjri Police Station u la ujor da ka Suomoto Case pyrshah ïa une u nongïalam da kaba kynnoh ba ka jingkren jong u ka wan rah ïa ka jingpher niam ha ka jylla bad ha ka ri India bad ruh ba u la dep ban kren ba ka CoMSO ka kloi ban rah ïa ki tiar ki tar lada ki para riewlum Garo ki shah thombor ha ka jylla.

Haba kren sha ki lad pathai khubor mynta ka sngi halor kane ka jingshah khot hajir, u Bah Roykupar Synrem ula ïathuh ba ha ka ejahar ki Pulit ka Lumdiengjri Police Station ki la kynnoh ba ka jingkren kaba u la kren ha ka jingïalang kaba la long ha Motphran ka lah ban wanrah ka jingsngewpher niam bad kaba lah ban pynthud ïa ka shongsuk shongsain ki paidbah ha ka jylla.

“Ka la don ka kyntien kaba nga la kren ha Motphran kaba la saphriang ha ki social media kaba la kynnoh ba nga la kren pyrshah ïa kiwei pat ki jaidbynriew ba ki paidbah ka Hynniewtrep kin long kiba la khreh ban rah tiar ban ïakhun pyrshah ïa kiwei pat ki jaidbynriew kiba thombor ïaki jaidbynriew riewlum Garo” la ong u Bah Roy.

Haba pynshai pat halor ka jingkren jong u bad ka jingshah khot hajir ha ki pulit, u Bah Roykupar Synrem u la pynpaw ba kum ki nongïalam seng ki sngewkhia halor kane ka jingshim khia ki pulit ban ujor da ka suomoto, namar la bun ki khep lada kren bein kiwei pat ki briew ki bym dei ki riewlum ka Police Department kam lah satia ban shim khia kumba ka khot hajir ïa u kum u Chairman.

Shuh shuh, u la bynrap ruh ba ngi shong ngi sah ha kane ka ri kaba dei ka ri synshar paidbah bad ka ain ka dei ban long lang kumjuh ïa baroh khlem da don ka jingpynpher bad kaba sngewlyngngoh ka long ba ki Pulit ki shim khia tang lada ngat ha ki trai jylla bad lada leh kiwei pat ki bym dei trai jylla kim lah satia ban shim khia kumba  kila shim khia ban ujor ne khot  hajir ïa u.

Shuh shuh, u la kyrpad jur ruh ïaki Pulit ka Meghalaya ba kim dei ban leh shiliang ïano ïano bad ka ain ka dei ban treikam solonsar ïa baroh ym tang ban shim khia tang ïa ki trai jylla bad ïa kiwei pat kiba kren bein jaid byrniew kim ju lah satia ban leh ei ei, u la bynrap.