Nongpoh, Lber 27: Lai ngut ki Myntri ka sorkar jylla, kiba kynthup ia u Bah Lahkmen Rymbui, u Bah Sosthenes Sohtun, u Timothy D. Shira lem bad u Bah Mayraldborn Syiem, MLA Nongpoh, mynta ka sngi ki la leit ban plie ia ka North East Graduate Congress-2026, ka prokram jong ka jingiakynduh lang hapdeng ki samla pule ki jylla shatei lam mihngi, kaba la pynlong ha skulbah University of Science & Technology Meghalaya ha Baridua, Ri Bhoi.

Katei ka North East Graduate Congress-2026, ka dei ka jingiakynduh kaba phra ba la pynlong ha skulbah USTM ha kaba la wan ban iashimbynta da ki samla pule na ki 160 tylli ki Kolej bad 30 tylli ki University na ki jylla bapher bapher kiba don ha ki jylla shatei lam mihngi ka ri India.

Lyngba katei ka prokram, kitei ki samla pule ki la ïoh ban iashimbynta ha ki jait jingialehkai bapher bapher bad nalorkata, la don ka jingpyni ia ki rukom riam tynrai bad kaba la iashimbynta da baroh ki Kolej bad University kiba don ha ki jaka bapher bapher shatei lam mihngi.

Ha kane ka sngi la ai jingkren ruh da kitei ki myntri sorkar bad ki nongmihkhmat paidbah, kiba la ai mynsiem bad pynshlur ia ki samla pule ba kane ka jingiakynduh lang ka long kaba donkam na ka bynta ban saindur ia ka lawei ki samla pule ha kaba kum ki samla ki hap ban trei shitom ym tang hakaba lum ia ka jingnang jingstad bad ki hap ruh ban long kita ki samla kiba long ka lawei na ka bynta ki jylla bad ka ri.