Nongpoh, Lber 29: Ka Nongpoh Parish kum kawei ka Parish kaba don ha Ri Bhoi District mynta sngi U Blei ka la lah lah ban plie paidbah ne pynkyntang ym tang ia kawei ka ïingmane ba thymmai ka Balang Shnong Katholik Pahamrioh-Lumbyrhing, hynrei ha kane ka sngi ka la leh burom ruh ia ka sngi Satlai kaba dei kawei na ka jinglehniam ka Balang Katholik ban kynmaw burom ia ka jingrung U Jisu ha ka Nongbah Jerusalem ha ki 2 hajer snem tam ba leit noh shuwa ba un shah shitom ban iap halor ka diengphna.

Ki paidbah riewngeit ka Balang Katholik ba hap ha ka Nongpoh Parish mynta ka sngi ki la sdang ban iaid paidbah da kaba rah ia ki Slatlai ban kynmmaw burom ia ka jingpdiang ki paidbah ha ka porba u Jisu u dang rung ha ka nongbah Jerusalam bad kane ka pynkynmaw ia ki paid riewngeit kum kata ka jingleh burom hashwa ba u Jisu uba ki ngeit ba u dei u khun u Blei un sa shah shitom bad shah sah narphan lane ka jingsdang jong ka taiew bakhuid ka jingshah shitom u Jisu.

Ia katei ka ïingmane ba thymmai la pynkyntang ne pynkyrkhu bad plie paidbah da u Fr. Fr. Paul Olphindro Lyngkot, uba dei u SDB Provincial barim ka Shillong Province ha ryngkat ka jingdon lang u Fr. Peter Syiemlieh Parish Priest ka Nongpoh, u Fr. Sawlus Kharpran SDB, ki Sister, ki Catechist, ki rangbah balang bad da ki hajar ngut ki paid riewngeit ka Balang Katholik.

Haba kyrkhu bad pynkyntang ia kane ka ïingmane la pynlong lyngba ka Mass bakhuid ba la shim bynta shitrhem ki paid riewngeit ha kaba bam ban sip ia ka met bakhuid jong u Trai bad ryngkat katei ka jingleh burom ia kane ka sngi Satlai ba la ju tip paidbah ha ka pyrthei kum ka palm Sunday.