Shillong, Lber 31:  Ka Confederation of Meghalaya Social Organisations (CoMSO) mynta ka sngi ka la dawa syndon na ka sorkar pdeng bad ka sorkar jylla ban pyntreikam kyrpang  noh ïa ka ‘Special Intensive Revision’ (SIR) jong ki electoral rolls ha ka jylla da ka jingthmu ban weng noh ïa ka kyrteng jong kito kiba wan ban shong ban sah beain na ka thup jong ka electoral roll bad ruh ban dawa ban pynbeit biang (Amend) ïa ka Constitution (Scheduled Tribes) Order, 1950 na ka bynta ka jingmyntoi ki riewlum ha ka jylla Meghalaya.

“Ngim lah ban len ïa ka jingshisha ba ki don kita ki ba la wan rung beain sha ka jylla Meghalaya bad kine kiba briew kiba nabar ym tang ba ki la wan rung beain bad ban shong ban sah ha ki jaka ki puta jong ki riewlum bad bun ki la shim kabu ruh ban don bynta ha ki kam sain hima sima” ong u Chairman ka CoMSO u Bah Roykupar Synrem haba kren hadien ka executive Committee ka seng kaba long mynta ka sngi ha Shillong.

U la ong ruh ba la donkam kyrkieh ba lyngba ka Special Intensive Revision, kan ïarap ban weng ïa kito kiba wan rung beain bad kiba la ioh ban pynrung kyrteng ha ka thup jongka electoral roll ka jylla bad ruh ban ïada na ka jingshim kabu ban don ïa ki EPIC thep vote ha ki ar jylla da kaba ai nuksa ïa kito kiba shong bas ah ha khappud ka Assam bad Meghalaya.

Ha kaba ïa dei bad ka ST order, 1950, u Bah Synrem u la ong ba la ithuh tang 53 haduh 54 kiba dei ki riewlum ha Meghalaya bad kynthup kito kiba dei na ki jylla shatei lam mihngi ka ri ba la shah ban thied jaka, ban ïa khun election bad ruh ban leh ïa ki ka khaïi pateng khlem kano kano ka jingshah tehlakam.

“Kane ruh ka shah tang ïa ki jaid byrniew riewlum na kiwei ki jylla ban ioh ïa kajuh ka hok bad ym shym la leh kumjuh ïa ki Khasi, ki Jaintia bad ki Garo ha kiwei kiwei ki jylla” u la ong.

U la ong ruh ban ïada na ka jingioh pynrung kyrteng beain ki briew ba nabar ha ka thup jong ka electoral roll, ka CoMSO kan sai jingthoh sha ka Union Home Ministry bad ruh sha ka Election Commission of India, ban kyrpad na ka bynta ban pyntreikam ïa ka Special Intensive Revision bad ruh ban pynbeit biang ïa ka ST Order, 1950.

U la ong ruh ba ka CoMSO kan sa kynduh ruh ïa ki seng sain pyrthei bapherbapher, ki nongïalam shnong nongïalam hima ban pysngewthuh halor kitei ki mat  bad ruh ban ai por ïa kas orkar na ka bynta ban tied jingkhang sha ka sorkar kmie ban pyntreikam halor kitei ki ar tylli ki mat.

Shuh shuh, u la bynrap ruh ba ka CoMSO kan sa ai jingthoh ruh sha ka sorkar jylla bad ka sorkar kmie tang hapoh kane ka taiew ban shim khia halor kitei ki mat bad ruh yn ai por ban rah ïa kane ka mat sha ka sorkar India bad ruh sha ka Election Commission of India ba kin shim khia halor kitei ki 2 tylli ki mat ba la rah da ka CoMSO, u la bynrap.