Shillong, Ïaïong 02: Ki trai jong ki par dewiong ha Jaintia Hills ha ka lama ka Jaintia Coal Miners and Dealers Association ki la shim syndon da ka rai kaba tyngeh ban pynlong da ka jingialang paidbah ha ka 7 tarik u Iaiong ha Jaintia Hills na ka bynta ban dawa da kaba tyngeh ia ka sorkar jylla bad ka sorkar pdeng ban shim khia na ka bynta ban pyntreikam noh ia ka Scientific Mining ha kaba ia dei bad ka kam tih dewing ha rilum Jaintia.

“Ngi da thrang eh ba ka sorkar jylla kan shim khia ba ia kren sha ka sorkar pdeng na ka bynta ban pyntreikam noh ia ka Scientific Mining kaba long ka jingailad ia ki trai par deiong ban ioh ban tih dewiong kum kita ki trai muluk ki trai jaka” ong u Bah Borrin Shadap, uba dei u president ka Jaintia Coal Miners and Dealers Association haba kren mynta ka sngi sha ki lad pathai khubor ka jylla.

Haba bynrap halor kane ka jingpynlong ia ka jingiaid paidbah lane ka Public Rally, u dhot katei ka Association u Bah Sambormi Lyngdoh, u la ong ba ka Supreme Court ka la pynpaw ba halor ka kam tih dewiong ka la ailad ba ia ki par dewiong dei hi ban long trai da ki trai muluk ki trai jaka katkum ka Sixth Schedule, hynrei ngi hap ban pyrkhat pat ia ka jinglong jingman ki jaka ki puta ba donkam ban pyntreikam da kata ka Scientific Mining kaba iahap katkum ki jinglong jingman ki jaka ki puta ha katei ka thain.U la ong ruh ba ka Association ka pynlong ia kane ka jingiaid paidbah ka long ruh ban dawa na ka sorkar ba ka dei ban thaw kyrpang da ka Committee ban leit sorjamin ia ki jaka ki puta bad ruh ban thaw ia kata ka polisi kaba iarap ruh ban ioh tih dewiong ryntih wat ki trai par dewiong ki barit kiba don ha katei ka thain.

“Ngi donkam ia kata ka Polisi ban tih dewiong kaba iarap ia ki trai muluk ki trai jaka bad ym kata ka polisi kaba ktah kylla ia ki trai muluk ki trai jaka” u la ong.

U la ong ruh ba ka Association ka angnud ban don kata ka jingkitkhlieh na ka bynta ban ioh lad ban tih dewiong bad ka jingtih dewiong kam dei pat ban long beain kaba ktah kylla ia ki trai muluk ki trai jaka.

Shuh shuh, u la ong ruh ba ka por ka la biang pura ba ka sorkar kan shim khia halor kane ka kam kaba ktah ia ki trai muluk ki trai jaka bad ruh ka seng ka la khot la wer naduh ki trai par dewiong, ki seng nongniah trok bad kito ki nongtrei kiba im na ka kam tih dewiong ba kin wan ban shim bynta ha katei ka jingialang ban pyni ia ka jingiatylli khnang ba kane ka mat jingdawa kan long kaba seisoh, u la bynrap.