Nongpoh, Ïaiong 08: Namar ka Ilekshon jied nongmihkhmat ki paidbah ka jylla Assam sha ka Assam Legislative Assembly, baroh ki dukan die Kyiad (Wine Shop) ha Ri Bhoi, ki la hap ba khang khyrdep haduh ar sngi kynthih, kata naduh hynnin ka 7 tarik bad haduh lashai ka 9 tarik, kaba dei ruh ka sngi thep vote jong baroh ki paidbah ka jylla Assam.

Katei ka jingpynbna ban khang khyrdep baroh ki dukan kyaid, ka dei kaba la pynbna da u Superintendent of Excise, Ri Bhoi District, Nongpoh, ha kaba ka sorkar ka la pynbna ïa ka “Dry Day” ne ka sngi Tyrkhong Kyiad ha baroh ki bynta ha Ri Bhoi, kata naduh ka por 5 baje jong ka 7 tarik bad kan kut haduh ka por 5 baje janmiet ha ka 9 tarik.

Katkum ka jingpynbna da u Superintendent of Excise, la hukum ban khang lut ïa baroh ki IMFL Retail Shops, Bars haki Hotels, Bonded Warehouses, Bottling Units, Breweries, Distilleries, Country made Spirit shops, Outstills, Canteens bad kiwei kiwei kiba hap hapoh u pud u sam ka Ri Bhoi District ba kin khang khyrdep ha kitei ki sngi ba la pynbna sngi Tyrkhong Kyaid ha Ri Bhoi.