Shillong, Ïaiong 8: U Conrad K. Sangma, Myntri Rangbah ha ryngkat u Bah Prestone Tynsong, Symbud Myntri Rangbah ha ka sorkar jylla, ki la leit sha Nongbah New Delhi, na bynta ban kynduh ïa u Kiren Rijiju, Myntri Sorkar pdeng ba dei peit na bynta ki jaitbynriew rit paidbah, kata na bynta ban kyrpad ïa u, ba u dei ban pynlong shwa ïa ka jingïakren ne ïatai kaba kham janai lem bad ki kynhun bapher bapher, kata shwa ban mynjur pynlong ain ïa ka Foreign Contribution (Regulation) Amendment Bill, 2026, ka Ain ka ban teh pyrkhing ïa kino kino ki kynhun kiba ioh jingïarap pisa na kiwei pat ki ri ha ka pyrthei.
Haba kren sha ki lad pathaikhubor mynta ka sngi ha Nongbah Shillong, u Conrad K. Sangma, u la ong ba ha ka jingïakynduh bad u Kiren Rijiju, u la kyntu ïa ka Sorkar Pdeng ba ka dei ban pynlong ïa ka jingïasyllok bad kito ki nongioh bynta, kata ban pynkylla ïa kiba donkam ha ka Foreign Contribution (Regulation) Amendment Bill, 2026, shwa ban mynjur ïa ka, namar ki sngewkhia halor ki katto katne ki kyndon ha katei ka bill, namar ki don ki kyndon kaba la ailad ban kurup ïa ki jingdon jingem ne ki mar ki mata da ki briew ka ain.
Ka nongrim kaba la pynlong ïangi kum ka sorkar ba ngin hap leit kynduh ïa ki heh Sorkar pdeng, ka long ba ngi sngewkhia eh halor ka hok longtrai mantrai jong ki jaka pule bapher bapher bad khamtam eh ha ki jaka pule ba pynïaid da ki Balang Khristan, ong u Conrad K. Sangma.
Shuh shuh, u Conrad K. Sangma, u la ong ba katei ka jingleit kynduh ïa u Kiren Rijiju, ka jingïakren ka poi sha kaba sngewtynnad, namar na ka liang u Kiren Rijiju, u la kular ban shmkhia bad shim ïa katei ka mat kum kawei na kaba donkam hakhmat eh.
Namarakata, ngi kyrmen skhem ba kan don ka jingïakren kaba bniah bad yn sa don ka jingpynkylla ha ki katto katne ki kyndon, kata shwa ban mynjur ne pynlong ain ïa katei ka Bill, khnang ba kan ym ktah ïa ka hok longtrai ki jaka treikam ne ki jaka pule jong ki tir paid bad kiba la pynïaid da ki Balang Khristan, u la bynrap.
