Shillong, Ïaiong 09: U MLA ka Nongpoh Constituency u Bah Mayralborn Syiem mynta ka sngi u la pyntip ba shen ki 250 ngut ki longkmie nongthain jain Ryndia, kin ioh noh ïaka song pisa jingïarap naka Sorkar Jylla lyngba ka skhim CM Elevate.

Ïa kane u Bah Mayralborn ula ïathuh haba kren shaki lad pathai khubor hadien ka jingïalang bad u nongthain jain Ryndia naka thain Umling CRD Block haka jingdonlang ki heh ophisar jong ka tnat MBMA bad ka tnat Textile ka Sorkar Jylla.

U MLA ka Nongpoh constituency ula lum ka jingïalang hadien bala ioh pdiang ka jingujor naki longkmie ba kim pat ioh ïaka song pisa jingïarap naka Sorkar lyngba ka skhim CM Elevate naduh 2024 kaba ïaid lyngba ka tnat MBMA.

Haba kren shaki lad pathai khubor u Bah Mayralborn ula ïathuh ba ki 250 ngut ki nong thain jain Ryndia kin ioh mar T.78,000 bad na kane T.15,000 kadei ka bynta jong ka ram bad 5% kadei kaba ki nong thain jain kin hap ban ïarap kynshew hapoh shi snem.

U Bah Mayralborn ula ïathuh baki nong thain jain Ryndia kiba ioh jingïarap lyngba ka skhim CM Elevate kidei ban pynkhuid ïaka ram hapoh 7 snem.

“Kum u MLA ka thain nga lah ioh pdiang ki jingujor naki longkmie ba thain jain Ryndia bad dei namar kane mynta ka sngi nga la lum ka jingïalang bad ki longkmie haka jingdonlang ki heh ophisar naka tnat MBMA bad ka tnat Textile ka Sorkar Meghalaya” la ong u Bah Mayralborn.

U Bah Mayralborn ula ïathuh ba haka jingïalang, la shim ïaka rai ban pynsted ïaka jingsam jingïarap shaki nong thain jain Ryndia kynthup ka song pisa bad ki tiar ba donkam.

“Nalor ki kor thain jain, hapoh lai taiew ka song pisa kan poi shaki Bank jong ki 250 ngut ki nongioh jingmyntoi naka skhim CM Elevate” u la ong.