Shillong, Ïaiong 09: Ka Voice Of the People Party (VPP) mynta ka sngi ka la ther tyngeh syndon ïa ka sorkar jylla halor ki kam leh donbor bad pynibor ha kaba ïa dei bad ka jingïakhih ba jai jai ka Green Tech Foundation kiba pyrshah halor ka jingthmu ban lilam u lumpongdeng ha pung Umiam.

Ka jingshah kem u Chairman ka Green Tech Foundation u Bah H. Bansiewdfor Nonglang ha ka jingïakhih ba jai jai kaba khlem da pynkhein ain ka dei shisha kaba sngewkhia jur. Kum kane ka jingkhniot bein kaba pyrshang ban pynkbum ïa ka sur u paidbah ka dei ka kam thombor bad kaba  khein dew thala ïa ka hok longbriew man biew (Fundamental Right), ong ka kyrwoh khubor na u Dr. Londoner Murphy Sohtun, uba dei u Spokesperson ka VPP.

Ha katei ka kyrwoh, ka party VPP ka la pynpaw shai ba ka jingai ka jingkyrshan ïaka Green Tech Foundation bad kan kyrshan borbah ïa ki paidbah na ka bynta ban ïada ïa ki khyndew ki shyiap, ka mei mariang bad ruh ïa ka hok long briew manbriew bala pynkupbor da ka riti synshar ka ri.

Ka sorkar ka dei ruh ban kynmaw ba ka jingïakhih ba jai jai kam dei ka kam sniew ha kane ka ri synshar paidbah. Ka Part VPP ka dawa mardor ban pynlait noh ïa u Chairman ka Foundation u Bah H. Bansiewdor Nonglang bad baroh kiba la kem da ki Pulit halor kane ka jingïakhih jongki bad ruh kano kano ka kam leh thombor da ka bor kane ka pynduh jingshahniah ïaki paidbah, ong ka kyrwoh.

Ka party VPP ka la pynpaw ruh ba ka don ka jingsngewkhia kaba jur halor kane jinglilam jaka ha Umiam khlem da leh da ka lynti kaba khuid kaba suba ban shai pu paidbah bad khamtam ha kaba ïa dei ka jinglilam ïa u Lumpongdeng ha pung Umiam. La pynpaw ruh ba ka VPP ka la ju ruh ïa kane ka mat lyngba ka jingïakren bad ki bor sorkar bad ruh wat ha Assembly.

Namarkata, la pynpaw ruh ba ka sorkar kam ju lah ban ai jingtip sha u paidbah da kaba khuid ba suba bad ki paidbah ka jylla ki don ïa ka hok ban ioh jingtip halor kano kano ka soskular ba ïa soi ka sorkar la ka dei ïa ki jaka ki puta ne ki marpoh khyndew. Kane ka jingsngap jar bad ka jingleh mynthi ka sorkar ka paw shai ba ka don kaei kaei sha lyndet lane ki lah ban don mano mano ba ioh jingmyntoi shimet.