Nongpoh, Ïaiong 10:  Na ka skhim Inter State Border Area Development Programme (ISBADP) ka sorkar jylla ka la pynkmen shibun eh ïa ka Dorbar Shnong bad ki paidbah nongshong shnong ka Tyrso Umlyngdoh ba hap ha ka shnat Raid Tyrso ka Hima Mylliem, namar mynta ka sngi na ka jingshim khia u MLA ka Mawhati Constituency u Bah Charles Marngar u la lah ban plie paidbah noh ïa ka ïing Dorbar ka Shnong kaba ki la angnud bad phohsniew la bun phew snem ba la tei ha ka jinglut kaba la kot sha ka t. 6 lak tam lyngba katei ka skhim sorkar.

U Bah Charles Marngar kum u MLA ka thain u la shim ïa ka bynta kaba kongsan ban plie paidbah ïa katei ka ïing Dorbar ha kaba la sakhi lang da ki nongïalam ka shnong, ki seng longkmie, ki samla bad ki paidbah nongshong shnong.

Ha kane ka sngi, na ka liang u Bah Charles Marngar u la pynpaw ruh ba u dap shisha ka mynsiem jong ka jingkmen ban plie paidbah ïa ka ïing  Dorbar, kaba dei ruh ha ka lyngkhung sngi kha u (L) Dr. D.D Lapang, uba dei u rangbah bad u Nongïalam kaba u burom tam ha ka jingim bad uba la khlad noh na sla jong kane ka pyrthei ha ka 12 tarik u Nailur 2025.

Halor kane ka jingioh ïa ka ïing Dorbar ba thymmai, u Rangbah Shnong ka Tyrso Lumlyngdoh u Bah Pialshon Shadap. u la pynpaw ïa ka jingkmen bad ka jingsngewnguh ïa u MLA u Bah Charles Marngar, da kaba ong, dei namar ka jingïarap bad ka jingshimkhia jong u bad ban tuklar ban pynioh ïa kane ka Ïing Dorbar kaba Thymmai Lyngba ka Scheme ISBADP ka shnong ka la ioh ïa kane ka Ïing Dorbar kaba Nyngkong eh ha ka Shnong hadien ka jingangnud kaba la bun phew snem da ki nongïalam shnong bad ki paidbah.

Lyngba jong kane ka sngi, u MLA  u Bah Charles Marngar u la shim ruh ïa ka bynta ban pynkup burom ïa ki Saw ngut ki Samla pule ka Shnong kiba la pass bha ha ka Examination SSLC ryngkat ka song pisa bad ruh ha kane ka sngi la ai jingïarap ruh da ka Song pisa sha ka longiing jong uwei na ki Nongshong Shnong u ba don jingduna ha ki Dkhot met na ka bynta ban shna pynbha ïa ka Ïingsah ka jong u.