Nongpoh, Ïaiong 10: Kumba la don ka jingpyshah kaba jur na ka Green Tech Foundation bad la kyrshan ruh na ka liang ka Khasi Students Union bad ruh ka party VPP halor kane ka mat jingïakhih, ka District Tourism Promotion Society mynta ka sngi u la khot syndon ïa ki nongïalam shnong jong ki 5 tylli ki shnong ha ka thain Umiam, ka Meghalaya State Pollution Control Board, ka tnad Forest bad ruh na ka tnad Tourism ban ïa kren halor ka jingmih ka jingpyrshah ïa u lumpongdeng ha pung Umiam.

Haba ïa kren sha ki lad pathai khubor, u Deputy Commissioner ka Ri Bhoi, u Abhilash Baranwal u la ïathuh ba kane ka jingkhot ka District Tourism Promotion Society ïa kitei ki nongïalam shnong, ka tnad Forest, ka Pollution Board bad ruh na ka tnat Tourism ka long ban ïa kren halor katei ka phang ka jingpyrshah ïaka jingwan poi ka Taj Resort bad ka Spa ha Umiam.

U la ïathuh ba na ka liang ki 5 tylli ki shnong ba kynthup ïa ka shnong Mawlyndep, Umbir, Umniuh, Umsaw bad Umiam kim shym la pyrshah satia ïa ka jingwan kane ka Taj Resort bad Spa ha Umiam bad la dep ruh ban pyni da ka tender halor ka jingthmu ban wan rah ïa katei ka Taj Resort bad Spa ha Umiam ha kaba kan nym don jingktah ïa u lumpongdeng hapung Umiam.

U la ïathuh ruh lyngba kane ka jingïakynduh lang ka la long kaba seisoh namar na ka liang kitei ki 5 shnong kim shym la pyrshah bad kaei kaba ki pypaw ka long ba ki samla trai shnong ki dei ban ioh ïa ka kam ka jam.