Nongpoh, Ïaiong 11:  Tang hadien ba hynnin ka sngi u Deputy Commissioner ka RiBhoi, u Abhilash Baranwal, u la ong ba ki Shnong ki ba marjan bad ka  Dewlynnong Lum Pongdeng kim shym la don ka jingpyrshah bad ki ai ka jingkyrshan ïaka Project jong ka Sorkar ban Tei iaka Taj Resort and Spa ha utei u Lum, hynrei mynta ka sngi ki Rangbah Shnong jong kitei ki Shnong ki la mih shakhmat ban pyshai halor katei ka jingkren u Deputy Commissioner da kaba ong ba kim pat ai iaka jingkyrshan kaba pura naka bynta katei ka project bad ki dang iai ap khmieh lynti ban ioh shwa iaki jingpynshai lyngba ki kot ki sla.

Kine ki rangbah shnong kiba la mih ban pynsai paidbah sha ki lad pathai khubor mynta ka sngi ki kynthup ia u Bah Jinu Kharbuhki Rangbah Shnong Mawlyndep, u bah Steven Kharkhrang Rangbah Shnong Umïam, u bah William Lyngdoh Rangbah Shnong Umñiuh, bah u Bah PJ Kurbah Rangbah Shnong Umbir,

Haba kren sha ki lad pathai khubor mynta ka sngi naka liang kitei ki rangbah Shnong ki la Pynpaw ba kum ki nongïalam Shnong kim don kano kano ka jingpyrshah ïaka roi ka par, hynrei kim pat ai pat ïaka jingkyrshan naka bynta katei ka project namar ba ki kwah ban ioh jingshai shwa lyngba ki kot ki sla (Details Project Report lane ka Blue Print) bad hadien ba la ioh ban bishar bniah shwa lyngba ki kot ki sla kin ioh iaka jingshai la kane ka jingtei kan ktah em iaka Shnong ka thaw bad hangta ym sa lah ban ong eiei.

Ki la Pynpaw ruh ba kum ki nongïalam Shnong ki dang sah haka jingdum namar ba haduh mynta kim pat iohi ia kita ki kot ki sla kiba la pynkhreh ha kaba iadei bad katei ka project bad kum ki Nongialam Shnong haduh mynta kim pat lah ban ai iaka rai la kin kyrshan ne kin pyrshah ia katei ka project haduh ban da iohi shwa ia kita ki kot ki sla kiba ia dei bad katei ka project.

Hakaba ia dei bad ka jingiakhih pat ka kynhun Green Tech Foundation, na ka liang kitei ki Nongialam Shnong ki la ong ba kim don iaka jingtip hynrei ki la shu iohi tang haki lad pathai khubor bad naka liang ka Green Tech Foundation kam shym la wan ban ïa kren bad ki Nongialam Shnong bad ki la ong ruh ba ka jingiakhih jong katei ka kynhun kim don jingtip eiei bad kam shym la don ka jingiatreilang bad ki bor pynïaid Shnong.