Nongpoh, Ïaïong 11: Dad ka jingkmen bad ka jingsarong mynta ka sngi ka Khasi Students Union North Khasi Hills District Unit ryngkat ka KSU North Khasi Hills Eastern Border Area ki la leit ban pynkup burom ïa ka Samla Daïakmen Ika Talang kaba na ka shnong Umroi Umdohbyrthih iba la ioh ïa ka kyrdan 20th Position ha ka eksamin SSLC jong ka MBOSE, 2026 na ka Skul Ferrando Higher Secondary School Umroi Nongrah Ri-Bhoi District.
Ha kane ka jingpynkup burom la ïalam da u Samla Banjop Maring, Assistant General Secretary KSU NKHD Unit, U Samla Richard Lyngdoh General Secretary KSU North Khasi Hills Eastern Border Area, U Samla Banjovial, Orgasing secretary KSU Eastern Border Area, u Samla Wanteilang Marwein Education Secretary KSU North Khasi Hills Eastern Border Area, U Samla Augustin Shadap Assistant Education secretary KSU North Khasi Hills Eastern Border Area bad la don ryngkat ruh u Rangbah Shnong ka Umroi Umdohbyrthih u Bah P.B Sylliang lem bad katei ka samla bad ki kmie ki kpa ryngkat kiba haing hasem.
Ha ba ai jingkren u Rangbah shnong u la pynpaw ruh ïa ka jing sngew nguh ïa ka seng KSU kaba la kloi ban wan ai mynsiem bad ban noh synñiang sha kane ka samla u la kyntu ruh ïa kane ka samla ba ka dei ban nang ïai trei shitom shuh ha ki sngi ki por ban dang wan.
U samla Banjop Maring kum u nongïalam, u la pynpaw ïa ka jingkmen haba ki samla ka jaidbynriew ki wan shakhmat ha ki jingpule. U la ong ruh ba nalor kiwei pat ki mat ka KSU ka khmih kyrpang ïa ka jingkiew jong ka jaid bynriew ha ka pule puthi bad u la kyntu ba kum ka Samla pule ka dei ban nang ïai minot shuh shuh khnang ban nang ïai kiew shaphrang ha ka jingim ban nang wanrah nam bad burom ïa la ka iing ka sem bad ïa ka Jaidbynriew hi baroh kawei.
U la kyntu ruh ïa katei ka samla ba kum ka Samla im dei ban ai lad ban shah pynthame khamtam ha ka juk mynta ba bun ki shim sting ïa ka pule puthi bad kiew ka jingsarong kaba lah ban ïalam sha ka jingduhnong ha ka jingim.
Kumban shu pynkynmaw ruh ha kane ka snem ba mynta la don tang 2 ngut ki Samla pule na Ri Bhoi District kiba rung ha ka thup 20th ha ka exam SSLC 2026.
Ka Daïakmen IkaTalang ka dei ka khun jong ka Kong Sabianka Talang bad u Bah ( L ) Provident Massar bad kaba dei ka khun nyngkong na ki arngut shipara. Ka samla Samla Daïakmen Ika Talang ka dei ka samla ba wan na ka longing longsem ba mad shibun ki jingeh bad ki jingjynjar ha ka jingïaid lynti ha ka jingpule bad ha u snem 2023 ka iingsah jong kane ki longing ka la shah bam duh ha ki thylliej ding bad baroh ki jingdon jingem ki tiar baroh la shah bamduh ha ka ding bad ha u juh u snem ki la mat sah Kawei ka jingjia basngewsih ha kaba ki la duh ïa la u kpa uba dei u khliehduh jong ka iing.