Shillong, Ïaïong 13: Ka kynhun Hynniewtrep Border Dispute Redressal Forum (HBDRF)  mynta kas ngi ka 13 tarik u Ïaïong ka la shim kum kata ka sngi kaba sngewsih tam bad ka la shim ruh ïa ka rai kaba skhem ban ïa khun na ka bynta ban dawa ba ka Block-I bad Block II, dei ban pynhap beit sha ka jylla Meghalaya.

Ha ka kyrwoh ba la phah mynta ka sngi, u Chairman ka HBDRF u Bah Chandame Sungoh u la pynkynmaw sha ki paidbah ba kane ka 13 tarik u Ïaiong 2026, ka dei ka sngi kaba ki pynpaw ïa kata ka jingsngewsih khamtam na ka bynta ka Elaka Labang Nangphyllut Block-I bad ka Raid Nongtung Khyrwang Block II ba la pynkynthup jubor da ka sorkar Assam ha u snem 1951.

“ Dei ha u snem 1951, ba ka sorkar Assam ka la pynkynthup jubor ïa ka Block-I bad Block II na ka Jowai Civil Sub Division sha kata ka United Cachar Mikirs Hills bad mynta la tip kum ka Karbi Anglong Autonomous Council lyngba ka Notification TAD/R/31/50/150-151,” u la ong ha ka kyrwoh.

U la ong ba kitei ki jaka block I bad Block II ki dei jong ka Meghalaya  bad ka sorkar Assam ka la shim noh ne pynhap jubor sha Assam khlem da pyntip ne twad jingmut na ki Khasi-Pnar.

Shuh shuh, u la ong ba kane ka kynhun kan ïakhun pyrshah beit bad kan dang ïai dawa ba ka Block I bad Block II, dei ban wan rah biang sha ka jylla Meghalaya, ha kaba kane ka kynhun ka la kyrpad jur ïa ka sorkar Meghalaya ban shim khia ïa kane ka kam.

U la ong ruh ha ka jingshisha, kine ki jaka dei ban don hapoh u pud u sam ka United Khasi & Jaiñtia Hills  bad ka sorkar Assam ka la shu leh jubor khlem da pyntip ne khlem da ka mon jong ki Khasi Pnar, kiba dei kita ki nongshong shnong kiba don ïa ka hok halor ki jaka ki puta.

U Chairman ka HBDRF u la pynpaw ruh ba wat la ka sorkar Assam ka la kam  ba ka don ka jingbakla ïa kitei ki jaka bad ka la pynmih ïa ka ‘Notification RSR/296/51/130 on March 13, 1957’  na ka bynta ban phah sorjamin biang ïa kitei ki jaka bad kane ka thmu ban wan rah biang ïa kitei ki jaka sha Meghalaya kam shym la urlong haduh kine ki sngi.

“Ki ar tylli ki District Council, ka United Khasi & Jaiñtia Hills  bad ka United Cachar & Mikirs Hills, ki la pynlong lang ïa ka jingsorjamin ïa ki jaka ha ka 17-20 tarik u Rymphang 1958 bad la ïa rai lang ban pynphai biang ïa kitei ki jaka sha ka United Khasi & Jaiñtia Hills bad sngewsih kane ka jingthmu pynphai ïa ka Block I bad Block II kam shym la urlong satia haduh kine ki sngi, la ong u Bah Sungoh.

Namartakata, ka HBDRF ka la rai rangbah ba katba ka sorkar kam pat lah ban pynphai baing ïa ka Block I bad Block II sha Meghalaya, ka Fourm kan dang bteng ban ïa khih bad kan dang ïai pynlong ban rakhe ba ka 13 tarik u Ïaiong kan long ka sngi kaba dum bad ka sngi kaba sngewsih ïaki paid Khasi-pnar, u la bynrap.