Shillong, Ïaïong 13: Kum ka Seng Khasi kmie kaba bat ïa ka niam ka rukom bad kaba pynneh ïa ki riti ki dustur mynta ka sngi ka la pynkut noh ïa kawei na ka jingshad tynrai ba la ju tip paidbah kum ka ‘Shad Suk Mynsiem’ ba la pynlong ha Madan Weiking Jaiaw ha Nongbah Shillong.

Ha kane ka jingpynkut noh ïa kane ka Shad Suk Mynsiem da ki hajar ngut ki paidbah ki la wan ban sakhi ha kane ka Shad Suk Mynsiem ba ki Thei bad ki Rang Sotti ki ai ïa ki jingshad tynrai bapher bapher ban pynphuh pynphieng ïa kane ka Shad Suk Mynsiem kaba 3 sngi ba la ju pynlong man la u snem kum ka nguh ka dem blei.

Nalor ki paidbah bad Seng Khasi kiba la shim bynta ha kane ka Shad Suk Mynsiem, la wan ruh ban ai  mynsiem da ki nongmihkhmat paidbah, ki heh sorkar bad wat ki heh nongïalam ka Seng Khasi Kmie.

Na ka liang ki heh nongïalam ka Seng Khasi kmie ba kynthup naduh u Rgh DL Nongbri  vice president, Rgh PD Nongrum Vice president  bad u Rgh Rangpher Rynjah dkhot ka JPK, ki la ai khublei shad suk mynsiem sha baroh ki paidbah ka jylla.

Ki la pynpaw ruh da kaba ong, ba kane ka shad suk mynsiem ka dei ka jingshad kaba la sdang naduh u snem 1911 bad la don ruh ka jingpyrshah ban pynduh pyndam ïa kane ka shad suk mynsiem da kita ki Kharlieh bad ki Khariong, hynrei ka seng khasi ka ieng triang ban pynneh pynseh ïa kane ka shad tynrai.

Ki la ong ruh ba kane ka shad suk mynsiem la pynlong man la u snem ha ka aiom pyrem kaba long ka jingnguh ka jingdem blei shwa ban rep ban riang bad ruh ban ioh ïa kata ka jingkyrkhu na ki Blei ha baroh saw tylli ki aiom ha ka shisnem.

Shuh shuh, ka phang kaba hakhmat eh ba pynlong ïa kane ka Shad Suk mynsiem, ka dei ban ïaleh na ka bynta ban pynneh pynsah ïa ki riti ki dustur, ka rwai ka siang, ka shad ka kmen bad ka put ka tem tynrai, ha kaba ka seng Khsi ka dei kawei na ka seng ka pynneh ïa la ka tynrai, ki la pynpaw.