New Delhi, Jylliew 25: Kawei ka kompani kaba la paw bha ha ka pyrthei bad ka ri India kaba la tip kum ka kompani Oriflam kaba dei ka kompani ba pynmih ia ki jingtah jingsleh durkhmat, mynta ka kynti ka la pynbna ba ka don ia ka thong ban pynmih ne kyntiew ia ka jingpynmih ia ki jingtah durkhmat ba bunjait.
Ki bor jong kane ka kompani, ki la pynbna ruh ba kan iatreilang bad kiwei kiwei ki kynhun bad ruh ban ai jinghikai ia kine ki kynhun ban iatreilang bad ka Kompani Oriflame. “Ka thong hi ka long ban plie ia ka lad ka lynti ban aikam aijam ruh ia kiba 10 lak ngut ki samla ne ki kynhun ban kyrshan dalade ialade khamtam ia ki riewkynthei”, ong ka khubor na ka kompani.
“Yn pynkhlain ia ka lad iohkam iohjam khamtam ban phaikhmat sha ki kynthei ban sengkam lade da ka jingiasnohktilang bad ka Kompani Oriflame lane ban iatehlok bad kane ka kompani hi”, ong u Edyta Kurek, Senior Vice President bad Head of India and Indonesia jong ka kompani Oriflame.
La iathuh ruh, ba ka ri India ka dei kawei na ki ri ba ki jingtah jingsleh durkhmat jong ka kompani Oriflame, ki iaid iew bha bad ka don ia ka iew kaba heh ha kylleng ki jylla jong kane ka ri da kaba ai ruh ia ka jingiaroh kaba khraw halor ka jingkyrshan bad ka jingshaniah jong ki nongshong shnong khamtam ki kynhun (Marketing Agencies) kiba trei shitom ban pyniaid iew ia ki jingpynmih na ka Oriflame.
