Nongpoh, Iaiong 14: Kum kawei na ki prokram kaba thmu ban pynkup bor shuh shuh ia ki longkmie, kata lyngba ka Nari Shakti Vandan Adhiniyam, mynta ka sngi ki nongialam ka BJP Nongpoh, ki la pynlong ia kawei ka prokram ba kyrpang ha Nongpoh, kaba long ruh kum shibynta ban wanrah ia ka jingialong kawei hapdeng ki para nongialam bad kumjuh ruh ban nang pynkup bor ia ki longkmie haba ki trei ha ki kam bapher bapher bad khamtam eh ha ka lain ban long nongialam ne kum ki nongmihkhmat paidbah.

La sdang ia katei ka prokram lyngba ka jingiaiaid paidbah na Ri Bhoi College bad pynkut pat ha ophis treikam ka BJP kaba don ha Nongpoh bad ha katei ka prokram, ka Kong Erina Hynniewta, ka la long kum ka kongsan, ha ryngkat ka jingdon ki nongialam seng longkmie, ki nongrep lem bad kiwei.

Ha katei ka jingiaiaid paidbah, ki longkmie ki la rah ia ki plakad, kiba long kum ka khubor halor ka jinglong iaryngkat, ka jingpynkup ia ki longkmie bad kumjuh ka jingialong kawei.

Lyngba katei ka sngi, ba la don katei ka prokram, la ioh ruh ban sam khusnam sha kito ki longkmie, namar ka jinglah jong ki ban noh synniang ha ki shnong ki thaw ba ki shong ki sah bad ha ka thain jong ki, kata ka long ha manla ki kam ba ki trei, kaba long ruh kum shibynta ban ai mynsiem ia ki longkmie.

Haba kren ha katei ka sngi, ka Kong Erina Hynniewta, ka la kren ruh halor ka jinglong ba kyrpang jong ki Longkmie ha ka jylla bad khamtam eh haba iadei bad ki kam iing kam sem, ba ki longkmie Khasi ki dei kiba donkam eh.

Ha kawei pat ka liang, ka la ai jingiaroh ia u Myntri Rangbah ka ri u Narendra Modi bad ia ka President ka ri ka Droupadi Murmu, kiba la pynurlong ia ka Nari Shakti Vandan Adhiniyam ha u snem 2023, kaba long kum kawei na ki jingthmu ban pynkup bor shuh shuh ia ki longkmie, ba kin long kum kita ki nongmihkhmat la ka long sha Iingdorbar Lok Sabha ne ha State Legislative Assembly, ha kaba lyngba ka Nari Shakti Vandan Adhiniyam, la don ka bhah ba kyrpang na bynta jong ki longkmie ba kin long kum ki nongmihkhmat paidbah.