Khliehriat, Iaiong 14: Haba shimkhia halor ka jingeh kaba la kynduh da ki paidbah na Hynniew tylli ki shnong, kiba kynthup ia ka shnong Moolamanoh, Moolang, Musniang, Musniangrim, Rangad, Lumputhoi bad Moonongtdu, ki nongialam ka Jaiñtia National Council (JNC) 7-Chnong Circle, kaba la ialam da u Mehi Rymbai, Incharge Secretary ka JNC 7-Chnong Circle, mynta ka sngi ki la leit kynduh ha ryngkat da kaba phah jingthoh sha u Sub-Divisional Officer (SDO) ka Meghalaya Power Distribution Corporation Limited (MePDCL) kaba don ha Khliehriat.

Ka nongrim kaba la pynlong ia kitei ki nongialam ka JNC &-Chnong Circle, ban leit kynduh ia u SDO, ka dei hadien ba ki la ioh jingujor na ki paidbah kiba shong ba sah ha kitei ki 7 tylli ki shnong, haba kaba ki la mad jingeh na ka jinglip palat ka bording ba man ka por bad haba lip ruh ka ju neh slem bha, nalorkata wat haba ym biang bording, hynrei ki nongshong shnong ki dang ioh ia ki bai bording ha ka dor kaba rem shaba palat pud.

Ha katei ka sngi, ba kitei ki nongialam bad dkhot ka JNC ki la leit ban kynduh ia u SDO MePDCL, ki la buh jingkylli ba ki daw kiba la pynlong ia ka jinglip bording ba khah khah ha kitei ki 7 shnong, namar ka jinglip bording ka la long palat liang bad kaba la ktah eh ia ki paidbah, ha kaba ka jinglip bording ka la shu long lynter tait, wat haba ym don slap ne lyer, hynrei ka bording ka shu lip beit.

Nalorkata, ki la ioh ruh ba pynsngew, ba ka jinglip bording ba khah khah ha kitei ki shnong, ka la ktah wat ia ki samla pule, kiba pynkhreh ïa ki eksamin, kaba la pynthut ïa ki rukom pule jong ki ne wat ia ki briew kiba pyndonkam ia ka bording ha kiba bun ki liang.

Lyngba katei ka jingiakynduh SDO MePDCL ka JNC, na ka liang u SDO, u la kular ba un shimkhia ha ka ban pynbeit noh mardor bad uba la pynpaw ruh ba ki paidbah ha kitei ki shonng, ba kin sa ioh noh ia ka bording kaba biang.

Namarakata, na ka liang ka seng ka la kyntu ia ka MePDCL ban pynthikna ba ka jingsiew bai bording kan iadei bad ka jingpynbiang ba shisha bad ban shim ia ki lad ki lynti ban pynbeit kloi ia ka jingpynpoi bording da kaba biang, bad lada kan iai jia kumne ka seng kam sa shim pat da kiwei ki lad ba tyngeh.