‘NA KA T. 40 KLUR SHA KA T.840 KLUR PYNKIEW KA SORKAR MDA IA KA MANG TYNGKA BAN KYNTIEW IA KA KAM IALEHKAI SPORTS: WAILADMIKI SHYLLA.
Nongpoh, Ïaiong 14:Ka Pantah 12 Panthers kala ioh ban rah noh ïaka nam lahduh haka lympung phainal jongka Pahamsning T20 Cricket Tournament 2026 kaba la pynïaid da ka Ri Bhoi District Cricket Association (RBDCA) mynta ka sngi haka dong Pahamsning jong ka shnong Nongkhrah ha Ri Bhoi District, hadien ba ka la lah ban pynliem noh ïaka Nongkhyllem Tigers da 33 run.
Ïa kane ka lympung ïalehkai la wan ban pynhap pyrda da u Bah Wailadmiki Shylla, myntri ka sorkar jylla ba dei khmih ïaka tnad Sports & Youth Affairs haka jingdon ryngkat jong ka Kong Rona Khymdeit, MDC ka Nongpoh, u Bah Rayonald Kharkamni, Honorary Secretary ka Meghalaya Cricket Association (MCA) lem bad kiwei de, ki nongïalam naka RBDCA ha ryngkat ki paidbah kiba la wan ban ai mynsiem ïa ki nongïalehkai.
Haba phai khyndiat sha ka jingïalehkai phainal ha kane ka sngi, ka kynhun jongka Pantah 12 Panthers kaba la jop ïaka jingkynting pisa lane kata ka toss, kala jied ïaka pali ban tied nyngkong bad lah ban kamai haduh 158 run bad hap noh 7 tylli ki wicket ha ki 20 overs jongka jingïalehkai. U namtam uba ioh ban tied bun run eh naka Pantah 12 Panthers udei u Wallam Kharbithai, uba la lah ban tied haduh 61 run na ki 56 tyli ki bol pynbud sa u Gaurav Narleng uba la ioh ban tied 33 run na ki 17 tylli bol.
Haba dei pat sa ka pali ban tied, ka Nongkhyllem Tigers kala lah ban kamai tang 127 run bad hap noh 7 tylli ki wicket haki 20 tylli overs namar ka jingtriem jong ki nongkawang bol ka Pantah 12 Panthers bad u nam tam uba la lah ban tied bun eh ka run na ka Nongkhyllem Tigers udei u samla Bharat Gurung uba la ioh kamai haduh 60 run na ki 57 tylli ki bol bad khlem shah pyn out tad haduh kaba kut.
Kum ka nongjop, ka Pantah 12 Panthers kala ioh ban rah ïaka song pisa kaba T. 1 lak ryngkat bad ka trophy katba ha ki khusnam shimet pat, ïaka nam Player of the match bad Best batter la ioh da u samla Wallam Kharbithai naka Pantah 12 Panthers katba ïa ka nam Best bowler la ioh khur da u Laxman Gurung, u nongkawang bol ka Nongkhyllem Tigers uba la ioh ban khur haduh 4 wicket bad ai tang 32 run ha ki 4 over.
Ha kane ka sngi, haba ai jingkren na ka liang u Myntri ka tnad ka kam sport u Bah Wailadmiki ka la ai mynsiem ia ki khun samla kiba ieit ia ka kam sport, namar na ka liang ka la pyntreikam ia ka Meghalaya Outstanding Sportsperson Direct Appointment Policy 2025, namar kino kino ki samla kiba wan rah nam la ka dei ha ka National ne ha ka International ka sorkar kan thung kam direct ia ki, kam pher la ha kano kano ka jingialehkai sports.
Shuh shuh, u la iathuh da kaba ong, ba ha ki sorkar ba la leit noh ka mang tyngka na ka bynta kam ialehkai sport ka dei tang T. 40 klur, hynrei ka sorkar MDA mynta ka la pynkiew haduh T. 840 klur, ha kaba ka thong ka long ban kyntiew ia ki khun samla kiba don sap ha ki kam ialehkai sport.