Khliehriat, Ïaïong 15: Ki ar tylli ki kynhun ka East Jaintia Hills Truck Owners Transport Association (EJHTOTA) bad ka Jaintia Hills Truck Owners Association (JHTOA) ha Rilum Jaintia ki la ïa trei lang lyngba ka Joint Action Committee (JAC) ki la sdang da ka jingïakhih kaba khlem pud ban pyrshah ïa ka jingwan kitei ki Trok (Bulkers Truck) kiba kit Cement kaba la pynduh jakpoh ïa ki trai trok bad ki dribar na Rilum Jaintia.
Na ka liang ki nongïalam bad ki dkhot kitei ki 2 seng lyngba ka JAC ki la sdang ban ïakhih kaba khlem pud ban pyrshah bad ban khang ïa kitei ki Bulker Truck ban kit cement na Rilum jaintia, ha kaba ka jingïakhih ki la sdang hynnin ka sngi ha Tuberkmaishnong Tahkhniang hapoh ka surokbah National Highway-6 ha East Jaintia Hills, ha kaba ki la khang ban wan kitei ki Bulker Tuck ban kit Cement na katei ka District.
KA JAC kala dep ruh ban phah da ka shithi sha u Deputy Commissioner ka East Jaintia Hills District u Manish Kumar ha ka 11 tarik u Ïaïong 2026 bad ka phang kaba ki la pynpaw ka long ban khang noh ïa ka jingwan kitei ki Bulker Trok kaba la ktah ïa ki trai Trok bad ki dribar na katei ka District.
Haba kren sha ki lad pathai khubor, u President ka JHTOA u Bah Biangshwa Shylla, u la ong ba halor kane ka phang ka jingpyrshah, ki la dep ban phah da ka shithi sha ka bor District ka East Jaintia Hills bad ruh sha ki Cement Plant, hynrei kim shym la ioh ïa ka jubab bad dei namar kane ka daw ki la hap ban pynlong da kane ka jingïakhih ban pyrshah wan kitei ki Bulker Trok ba kit Cement bad la don ruh kaba ki pynphai kylla sha ka Cement Plant ba ki wan ban kit Cement ha katei ka surokbah.
U la kren shai ruh ba kane ka jingïakhih jongki, ka dei namar ba ki trai District kiba don Trok 200 haduh 300 tylli ki la shah ktah jur ha kaba mynshwa ki ju ioh ban kit cement kumba 80 trok ha ka shi sngi bad mynta pat ka la hiar ka jingioh kit cement sha ka 18 trok bad teng teng tang 15 trok ha ka shi sngi.
Shuh shuh, u la ong ruh ba lada ka bor District bad ki Cement Plant kim shim khia ïa kane ka jingshah ktah ki trai District kiba don trok, ki la rai ban bteng beit ka jingïakhih ban khang ïa ka jingwan kit Cement kitei ki Bulker Trok kiba la ktah ïa ka kami kajih ki trai District kiba don bun byllai ki Trok.
U President ka EJHTOTA u Bah Kyrshan Dkhar u la ong ruh ba kane ka jingpyrshah ïa kitei ki Bulker Trok, ka dei ruh namar ba ki Company ba pynmih Cement kim shym la thep shuh ïa u Cement ha ka byrni bad ki la phah kit beit tang da u powder ha kitei ki Bulker Trok, ha kaba kane ka la pynduh ïa ka bhah kaba ki dei ban ioh kit cement.
U la ong ruh ha ki snem ba la leit noh kitei ki Bulker Trok ki don tang kumba 2 ne 3 tylli, hynrei katba dang mih ki sngi ki la dang bun, ha kane ka ka la pyniap jakpoh ïa ki trai District ba don Trok khlem da ioh thikna shuh ban kit Cement bad kaba la pynlong ruh ïa ki ban ïa khih ha surok ban pyrshah kit cement kitei ki Bulker Trok.