Nongpoh, Ïaiong 15: Ki la don kumba khat-ar tylli ki shnong kiba hap ha Jirang C&RD Block, ki la ioh ban pdiang ïa ki Syrnot na ka tnat jong ka koit ka khiah na Ri Bhoi bad kata ka long ba hapoh kitei ki 12 tylli ki shnong, ym don wat tang uwei ruh uba don ïa ka jingpang (Tuberculosis) bad kaba la tip paidbah kum ka jingpang TB.

Ïa ka jingïalang ban sam Syrnot sha kitei ki shnong, ba la pynlong da ka District Tuberculosis Control Society (DTCS) Ri Bhoi, ïa kaba la pynlong ha ophis u BDO Jirang C&RD Block bad kaba la sakhi da ka jingdon u Bah Sosthenes Sohtun, Myntri Sorkar jylla, uba dei ruh u MLA Jirang, nangta u Dr. P. Hajong, BDO Jirang C&RD Block, ka Dr. E. Kalwing, District Tuberculosis Officer, ka Dr. K. Lyngdoh, Incharge Patharkhmah CHC, ki nongïalam shnong lem bad kiwei.

Ka jingsam Syrnot da ki briew ka koit ka khiah sha kitei ki shnong, ka long kum shibynta ban rakhe ïa ka TB Mukt Bharat Abhiyan, kaba dei ka thong jong ka sorkar kmie ban rat dyngkhong ïa ka jingpang TB ha India.

Ha katei ka sngi, nalor kaba sam Syrnot sha kitei ki shnong bym don kiba pang TB, la sam ruh da ki marbam ba tei met sha kito ki briew kiba dang don ïa ka jingpang TB.

Haba kren ha katei ka sngi, u Bah Sosthenes Sohtun, u la ai jingïaroh ïa ki briew ka koit ka khiah bad khamtam ïa ka District Tuberculosis Control Society, kiba la shimkhia bad trei shitom na bynta ban rat dyngkhong ïa ka jingpang TB ha kylleng ki shnong kiba don ha Ri Bhoi.

Namarkata, na ka liang u MLA u la kyntu ïa kitei ki shnong kiba la ioh ban pdiang ïa kitei ki Syrnot kum ki shnong bym don kiba pang TB, ba ki ïaleh ban pynneh ban long kum kita ki shnong bym don kiba pang TB ha ki snem ki ban wan, khnang ba kin nangioh shuh shuh ïa ki Syrnot, u la bynrap.