Khliehriat, Ïaiong 16: Ha ka step phyrngab jong ka 14 tarik mynta u Bnai, arngut ki runar kiba la ioh ban ringdur lyngba ka kor CCTV, ki la leit ban kyndang ïa ka ATM ka Bank HDFC, kaba don ha shnong Wapungskur, East Jaintia Hills bad kiba la ioh ban khung haduh T. 9 lak tam ka pisa.

Katkum ka tyllong khubor na ki Pulit ka East Jaintia Hills, la ong ba kitei ki runar ki la pyndonkam da ka Bolero Pick-up ba shu tuh ban poi sha katei ka jaka ba don ka ATM, ha kaba ynda ki la dep ban tuh ïa katei ka pisa, ki la iehnoh ha kawei ka jaka ïa katei ka Bolero Pick-lem bad bad kiwei ki tiar ba ki pyndonkam ha katei ka kam ban kyndang jubor ïa katei ka ATM bad kiba la phet krad noh da ka kjat.

Kitei ki runar ki la pyndonkam da ki kynja Cylinder Gas lem bad kiwei ki tiar ban kyndang ïa katei ka ATM.

Halor katei ka jingjia shah kyndang bad shah tuh ka ATM, ki Pulit ka East Jaintia Hills, ki la pynlong ïa ka jingtohkit bad kiba la ïalam ruh da ki ksew sma dien.

Kat haduh ba la thoh ïa kane ka khubor, ki Pulit kim pat iohksai ïa ki runar kiba la leit ban kyndang jubor ïa katei ka ATM.