Mumbai, Jylliew 25: Ka puron bna nam ha ka Bollywood ka Kangana Ranaut kaba la dei ruh ka MP ha ka ri India, mynta ka la mih shakhmat ban pynbna paidbah ba kan pynlait noh ia kawei ka phlim thymmai bad ba shimbynta bad thoh hi da ma ka kaba la jer kyrteng kum ka ‘Emergency’, kane ka phlim la pynshong nongrim halor ka jingjia ba la jia hapoh ka ri India ha u snem 1975.
Ka Kangana Ranaut’s, ka la pynbna ba kan pynlait paidbah ne pyni paidbah noh (Release) ia ka phlim Emegency ha u bnai ka 6 tarik Nailar 2024 ia kaba ka jingpynbna kane ka puron ka la pynbna ha ka rynsan social media jong ka hi. Lah ban kdew ruh, ba ia kane ka jingthmu pyni paidbah ia kane ka phlim la pynsangeh bunsien kumba la pynbna.
”Ha ka jingsdang jong ka ri India ban rakhe ia ka jingjam ia u mawmer ba 50 snem, ha kane ka phlim la bsut ruh ia kawei ka bynta halor ka jingjia kaba sngewsih bha bad kaba lah ban kdew ba ka dei kaba pyndum lyoh ia ka ri hi baroh kawei ha kaba ia dei bad ka riti synshar khaddar jong ka ri (History of Indian Democracy).
Ha kane ka phlim Emergency, la thoh bad akk ruh da ka Kangana Ranaut bad la pynbit pynbiang ruh da kane hi ka puron, la ia shimbynta lang ha kane ka phlim da ki puron bad tynshop ba pawnam ba kynthup ia u Anupam Kher, Mahima Chaudhary, Milind Soman, Shreyas Talpade, Vishak Nair bad u Satish Kaushik kum u tynshop ba hakhmat eh.
Ia kane ka phlim la pynbit pynbiang lang ban pynmih ia ka da ka Zee Studios bad ka Manikarnika Films, ia ki jingrwai bad jingtem jingput la pynbit da u Sanchit Balhara katba ka rukom akk (screenplay) bad dialogues la pynbit da u Ritesh Shah.
Lah ban kdew, ba ka phlim Emergency ka don ia ka khana ba batai bniah shaphang ka jingim jong ka Prime Minister barim ka ri India ka Indira Gandhi bad ka Kangana Ranaut kan akk kum ka Prime Minister ha katei ka phlim. La kdew ruh, ba Prime Minister barim ka Indira Gandhi ka la pynjari da ka emergency ha ka ri ha u snem 1975.
