Shillong, Jylliew 25:
U Myntri ba dei khmih ia ka tnad Housing jong ka sorkar jylla, u Marcuise N Marak hynnin ka sngi, u la pyntip ba kan don ka jingtohkit ban lap ia ki jingbymbiang halor ka jingthied ia ki tin sop ing, kaba la mih ruh ka jingkynnoh ba ka la don ka jingbamsap ba shyrkhei halor kane ka kam.
Kum ban shu kdew, ka Hynniewtrep Youth Council (HYC) ha ka 20 tarik jong u bnai Jylliew, 2024 ka la thad madan halor ka jingbamsap na ka jingthied ia ki tip sop ing, kiba ka seng ka la kynnoh ba kidei kiba tad bad kiba stang kum ka snep rynsun snep piat. Ka seng ka la dawa ruh ba kadei ban don ka jingtohkit halor kane ka jingthied ia kitei ki tin sop ing, ki bym iahap katkum ka jingbthah jong ka tnad Housing.
Ha kawei pat ka bynta, u Marcuise N Marak u la kyntait mardor halor ka jingkynnoh ba kala don ka jingbymbiang ha ka jingpyntreikam ia ka skhim Jal Jeevan Mission ha Garo Hills, da kaba ong ba ka tnad PHE ka dang ialeh ban peit bniah ia baroh ki jingujor bad pyntip ruh dalade hi un sa leit ban jurip sha baroh ki jaka jong ka jylla ban peitkhmih bad tip ia ka jingpyntreikam ia kane ka skhim, lada lap ia kino kino ki jingduna, un sa shimkhia ban pynbeit iaki mardor.
