Khliehriat, Ïaïong 17: Na ka jingkyrpad ka bor synshar District ka East Jaintia Hills halor ka jingïakhih ba khem buh por ka Joint Action Committee ki ba dei ki ar tylli ki kynhun seng ha East Jaintia Hills kiba la pyrshah jur ïa ki Bulker Truck ba kit cement ha East Jaintia Hills, kitei ki 2 tylli ki seng ha ka lama ka JAC ki la ailad ban pynlait ïa ki 10 tylli ki Bulker Truck ba kit cement hadien ba la kyrpad da ki bor sysnhar District ba lada ym ailad ki Cement ba kit kitei ki Bulker Truck kin sa sniew noh.

Kum ban pynkynmaw, u President ka East Jaintia Hills Truck Owenrs Transportation bad uba dei u Secretary ka JAC, u Bah Kyrshan Dkhar u la dep ban pynbna ïa kane ka jingïakhih ba khlem buh por ha ka 16 tarik u Ïaiong 2026 ban pyrshah kit Cement kitei ki Bulker Truck na ka daw ba ki trai jong I Trok ki la shah ktah ha ka liang ka kamaika kajih da ka jingwan kit cement kitei ki Bulker Truck.

Kine ki 2 tylli ki Seng ka East Jaintia Hills Truck Owners Transport Association (EJHTOTA) bad ka Jaintia Hills Truck Owners Association (JHTOA) ki la ïatrei lang ha ka lama ka Joint Action Committee bad hadien ba la kyrpad da ki bor sysnhar District ki la ailad tang 10 tylli ki Bulker Truck ban ïaid hadien ba la shah bat ha ka JAC.

Shuh shuh, na ka liang utei u nongïalam u la kyrpad ruh ïa ki dkhot ka Association ba kin ïa sngewthuh lang bad ka jingpynlait ïa kitei ki 10 tylli ki Bulker Truck, ka dei ka jingkyrpad na ka bor synshar District bad kin ailad tang shisien bad lada ki dang bteng biang ban kit Cement kin leh da kaba tyngeh.

U la bynrap ruh ba ka JAC kan dang peitngor ban bat ïa kitei ki Bulker Truck bad u khot u wer ïa ki dkhot ban ïa trei lang bad lada ki jingdawa kim urlong kin bteng beit ïa ka jingïakhih bad ruh ula maham jur ba lada ka Star Cement kam lah ban pynurlong ïa ki jingdawa kin ïaid shaphang ban leh da ki lad kiba tyngeh, u la byrnap shuh shuh.